Tin, a pasal le an fale panga cu US ah a kal ding an si cang. Interview an tuah cang, blood test zong an tuah cang, cun a dangdang herhmi zong an tuah dih cang. A ngeihchun thilril zong timh cia in an chiah dih cang hna. A phone zong khat phikphat tein an tun dih cang tiah VOA News nih a tial.
US embassy leiin vun auh lawng a tang cang. September thla hlan chungah US ah a zuang ding an si cang. A luan cia kum hrawng in US ah Kawlram a lutmi hi 160,000 leng an si. Ramdang vialte naak in an tam deuh. 2007 hnu lengbang cun US ah kuatmi refugee vialte lakah a tam cem an si. A buaktlak in tuak tikah 25% an si tiah a tial chih.
Asinain refugee milu 110,000 in 50,000 a thumh i pheomi 60,000 chungah hin Associated Press nih a tuak ning ahcun Kawlram refugee an si tiah a chim. Ram ruk khammi Muslim ram chung minung an si lai a ti.
Malaysia refugee chungkhar hna sinah biahalnak an tuah i, 'Biaknak leiin kan chim ahcun America cu kan pacan hna nan si' tiah Tin nih VOA News ah a chim. 'America cu Missionary a kan thlahtu an si i Khrihfa si ding in a kan cawnpiaktu zong nan si. Atu cun refugee dirhmun in kan um cang i, atu kan duh bikmi cu kan himnak hi a si' tiah a chim chih.
A pasal zong an hal ve. Malaysia ah sianginn cachimtu Sang 29, nih Trump minthut hnuah a chimmi cu 'US in tapung le mi thalo cu an thawl hna ding an si ko. Trump riantuanmi ka hnatlak pi ko. Asinain kanmah cu tapung kan si lo. Khrihfami kan si. US ah zeitik hmanh ah buainak sertu kan si lai lo. Fimnak kan cawng lai; rian kan tuan lai; himnak kan kawl lai' tiah VOA news ah a chim ve.
Malaysia ah sifak ngaiin khuasami an si. An fale zong sianginn a kai kho lo. Asinain Muslim mi thalo ka kham hna a tiknak hna ah Tin le a chungkhar zong a hren chih hna tiah VOA nih a tial chih. 2016 in 2017 tiang ah US a lut cangmi refugee hi 38,000 hrawng an si cang i, September 2017 chungah 72,000 a lut than ding an si nain lak ding minung a thumh caah 12,000 hrawng an tang cang.
Homeland Security le Secretary of State nih hnathlaknak an tuah khawh ahcun an karhter bang men te lai. An tuak ning ah a luan cia thla 12 chungin atu tiang refugee a lutmi ah Syrian an tam cem i, Kawlram leiin a lutmi cu an tla ngaingai. 2015 in atu tiangah 26% in 8% tiang an tla tiah VOA nih a tial chih. (VOA News nih zawnruahnak he a hleiin a vun langhtermi a si lo ngai). Ref: VOA News.