Zahan thla hrawng i Lai Tlang a rak tlawn i Rung Tlaang phungki an lennak hmanthlak a rak chuah ahcun Vice President Hennry Van Thio cu thangthat a tong ngaingai. A hawile phungki hmaiah an kun lioah a kun lo. Mah hi pei pacan taktak le Khrihfa taktak timi cu a si cu tiah thangthat le conglawmh a tong ngaingai.
Asinain nizan ah phungki hmaiah a thut i, a kut aa sihnak hmanthlak a rak chuak than i, an dinnak in a fahnak tiang an vun ceihphai thluahmah than. Hmanthlak pakhat kan hmuhnak in a kong kan ceihmi a si ahcun a ceihtu zong kan palh khomi a si. Asinain hmanthlak pakhat hmuhnak in Laimi tampi cu kan phunzai i, kan thachia hna. Zai phu le thachiat phu ah ka hmu lo.
Kan hmuh lomi chungah zeidah a tuah timi kan theih lo caah a hmanthlak kan hmuhmi vialte in ka ruahnak ka vun chim ve ko lai.
VP Van Thio nih phungki hmaiah a kutsih in a kun lai i, a taw aa perh lai i, phungki a biak hna lai timi ka zum lo. A tuah ahcun zumtu Khrihfa pakhat dirhmun cun a zumhnak a buar cang tinak a si lai. Zeitin dah ka zumhnak ka buar i, zeidah ka zumhnak ka buarmi a si timi theih hi a biapi taktak. Asinain a tuah lo i, a hmanthlak hmuhmi tiang lawng khi phungki hmaiah um ning a si ahcun soisel ding pakhat hmun ka hmu lo.
Minung nih a hmun le a caan zawn ah umtu ning thiam, cawlcangh ning thiam le thutdir ning thiam hi a herh lengmangmi a si. Paul nih Siangpahrang hna hmaiah bia a chim tikah Siangpahrang hmaiah umtu a herh ning le cawlcangh a herh ning in um khawh aa zuam. Cucu zumhnak buar a si lo. Minung pakhat le pakhat an i pehtlaih khawhnak caah phung pakhat bantukin an si. Cu bantuk i theihthiampiak lo ahcun minung le minung karlak ah pehtlaihnak a um thiam ding le a um kho ding a si lo.
Cucu tutan ah Pu Hennry Van Thio nih a tuahmi a si. Vice President pakhat dirhmun in a lianmi phungki puai ah kal loin um seh law zeitluk in dah a zoh chiat lai. Amah pumpak, a chungkhar le a miphun tiang in a mithmai bi ding kan si. A liang cungah a ummi tuanvo nih tuah lo awk tha loin tuanvo a khinhmi a si. Cun phungki hmai le a riantuantu upa saangsaang hna hmaiah phundang pi khin thu ve seh law aa dawh lo tuk dingmi thil a si than.
Cucaah a hmanthlak tiang i a tuahmi tal khi cu tuah ding hrimhrim a si. A zumhnak a buarnak le Khrihfa phung a buarnak a um lo. A kut aa sihmi le a khup aa bilmi cu a riantuantu hawi a upat ve hna zong a si; phungki zong a upat ve hna a si ko. Cun phundang in kan chim ahcun Khrihfa ka si tiin upatnak langhter loin thu ve sawh seh law hmailei ah a ruantiantu upa nih Khrihfami hna sinah zei bantuk lungput dah an ngeih ve la timi chim khawh a si lo.
Cucaah a tuahsernak khi cu a fate a si. Minung le minung karlak ah upatnak langhternak menmen a si. Laimi mithmai a hmuhternak zong a si i, upattlak zong a si. Zumhnak buarnak aa tel hrimhrim lo. Biaknak dang le biaknak dang biaruahnak (communication) menmen a si. A hawile an kun i phungki an biak lioah a kun lai i a biak ve hna lai timi ka zumh lo. Tuan ah biafiang kan theih fawn lai tiah ka zumh.
Asinain hramhram in phungki hmaiah na khup naa bil lai i, na lu tuang ah na tonghter lai i, phungki na biak hna lai an ti i, a zulh ve taktak ahcun a palh lai. A zumhnak a buar zong a si cang lai. Asinain khi tiangtiang khi cu an tuahter lai ka zum lo. A kunter i a biakter ahcun fak piin cozah mawhchiat awk an si lai. Cozah hrimhrim zong an palh lai. Hlan chan Egypt tbk le Babylon chan siangpahrang hna chan uknak he kan i khat tinak a si lai.
Atu cun kan i dang tuk cang. Kan ram hi uknak zong a tha rih lo; zalonnak zong a tha tuk rih lo nain biaknak zalonnak cu kan ngei. Kan ngeihmi chungah pumpak zumhnak kha hramhram in namnehpiak khawh kan si ve lo. Tahchunnak ah Pu Van Thio kha hramhram in phungki hmaiah na kun lai an ti kho hrimhrim lo. A kun ahcun mah lungtho tein a kun bia a si lai. Hramhram in an kunter ahcun a kuntertu kha tazacuai khawh an si lai.
Cucaah a hmanthlak tiang lawng khi phungki hmaiah a tuahmi a si ahcun a palhnak pakhat hmanh a um lo; soisel awk zong a um lo, asinain a lang lomi ah a rak kun i, phungki hmaiah a tawtawk aa perh ve i, tuang tawng in a lu aa khun ve ahcun a zumhnak a buar tinak a si lai. Chim miphun hrimhrim phungki a kan biak pi tinak a si lai. Biahalnak a tuah hmasatu sinin thawngpang fiang tein kan theih te lai!