Zarhpini kha Vice President Mike Pence le a chungkhar cu Coral Springs-based Church, Florida ah an i pum i, Pastor David Hughes nih biahalnak zong a tuah. A donghnak ah thla kan campiak kho lai maw tiah Pastor Hughes nih a hal i, Mr. Pence nih a tanglei bantukin a lehmi a si:
'President Trump a siah keimah ka siah khawika hmun a siah mipi lak a siah pumpak sinin a siah a thlum bikmi bia kan theihmi cu 'thla kan in campiak hna' timi hi a si. Kan sinah minung an ra tawn i nan caah thla kan in campiak lengmang hna' an kan timi hi kan caah cun a tlum bikmi bia a si' tiah Pastor Hughes cu a leh.
Pence nih a chim thanmi cu 'thla nan kan campiak fatin te kan rak theih lengmang ko. Thlacampiaktu kan ngei timi hi kan theih lengmangko' tiah a chim chih. Exodus 17 chung i Israel nih Amalekites an doh lio i Moses kut thlir an bawmhnak kha tahchunnak ah a lak.
President Trump le a chungkhar an siah keimah le ka chungkhar kan siah thla nan kan campiak tikah kan rak theih lengmang ko timi theihter kan in duh hna. Thazaang kan rak la kho lengmang. Ngol loin thlacam kan bawm lengmang ko u tiah thazaang pek kan duh ve hna. Kan ram caah riantuantu nu le pa vialte hna caah thlacamnak philh hna hlah u a ti.
Pastor Hughes nih a chim thanmi cu 'nan sinah kan i pum kho hnga maw tiah Vice President Office nih a kan chawnh hmasa' a ti. A chim thanmi cu 'nan i pum kho tuk. President a siah Vice President a siah Jesuh Khrih he nan i pehlaihnak kong chim zong kan in onh ko hna; zeitin dah nan riantuannak tiang ah nan langhter timi chimnak caan zong kan in onh ko hna tiah ka leh hna' a ti.
Mr. Pence nih a zumhnak (testimony) le thazaang peknak zong a kan chimh. Chungtel 9,300 hrawng cu hmailei zong ah thlacamnak in kan bawm lengmang ko u tiah forhfialnak zong a chim tiah Pastor Hughess nih a chim. Ref: TCP.