A donghnak caan a phak tikah cun Kim Jong-un nih nuclear in US a kah te hna lai tiah North Korea a zam takmi Hyeonseo Lee nih a chim. Kum 17 a si in a rak zam tak cang. A chim thanmi cu US kah ding in Kim Jong-un nih voihnih khua a ruat lai lo a ti.
North Korea mipi vialte an thluak a tawl dih cang hna. Vawleicung ah a thawngbikmi hriamnam a ngeimi cu North Korea kan si tiah an zumh dih cang tiah a chim chih. US a kahnak deu video an langhter hnuah Hyeonseo Lee nih North Korea hruaitu lungput a chim.
Ms Lee 37 nih a chim thanmi cu 'nirukni i a hriamnam thazaang a langhtermi vialte hi US kah ding in timh cia ka si cang ti langhternak caah a tuahmi a si. A donghnak ni a phak i ka sung ko lai timi a theih ni ahcun a nuclear hriamnam a hman te lai. North Korea ah an au pimi cu 'America a thi lai, kan thi lai, kan zate in kan thi lai' ti hi a si tiah a chim chih.
North Korean mipi zong nih thih ding in an i ruah dih cang. Kim Jong-un nih nuclear a hman caan a phan te lai i American zong an thi lai; kanmah zong kan thi lai timi hi an i theih dih cang tiah a chim. South Korea zong a kah te lai; Japan zong a kah te lai i US zong a kah te lai.
Uktu tha lo a si bantukin Kim Jong-un caah zamnak lam a um lo. A donghnak ni cu nuclear hriamnam hman hi a si ko lai tiah a chim. Ms Lee nih a chimmi cu kum 7 ka si in minung an thahmi an ka hmuhter cang a ti. 'Atu cun minung an thahmi hna hi an kah cang hna' a ti.
Ms Lee hi a thli tein Taluk ah a rak zam i, a hnuah South Korea ah a zam than. North Korea ah a thli in a lut than i a nu le a tapa a va lak hna. South Korea ah an um cang. North Korean mi thah ning a chimmi hna hi tih an nung tuk. A bu in minung thah an hmang a ti. Ref: The sun.