President Trump nih Syria a phomhmi cu dawtu he dohtu he an thangthat dih. An hmurka in an chim lo hmanh ah an lungchung cun an hnatlak pi dih ti a si. US Security runvennak kongah a puitling tukmi biachahnak an tuahmi pakhat a si tiah an thangthat hna.
US ralkap lei upa pakhat nih VOA News ah a chimmi cu 'hlawhtling taktak in Syria an kah khawhmi le Syria kah ding in biachahnak puitling tuk an tuahmi hi President Trump Security Adviser General H. R. McMaster ruahnak peknak in a si' a ti.
President Trump nih National Security ruahnak petu ah General Micheal Flynn a rak thim i, Russia kongah a cawlcangh aa dawh lo caah an rian an dinhter than. Mah hnuah H. R. McMaster hi a thim thanmi a si. Inn Raang i a riantuannak hi zarh hleihnih lawng a si rih.
McMaster hi Iraq le Afghanistan ah caan sau pi a rak um cangmi a si. Tonmi le hmuhmi tampi a ngei cang. Flynn an chuah in a hmun ah a rak lutmi a si. Tutan Syria kahnak kongah Trump ruahnak a pekmi cu thangthat awktlak a si tiah a chim.
President Trump nih Syria a vun phomh cu mipi an lau dih. Syria kah le tongh a rak duh bal lomi a vun phomh hna cu an khuaruahhar cio. Asinain uar a um tukmi cawlcangh a si. Mipi cungah sivaidat hman khawh a si lo timi fiang tein an langhtermi a si. US ambassador Nikki nih cun 'Syrian President Assad thumh lo awk a tha lo' a ti. Ref: VOA News.