North Korea kongah buainak a linhsat cuahmah lioah France raltuknak tilawng Amphibious pi zong Japan ah nirukni ah a rak phan cang. Hmai thla chungah Guam ah Japan, US le Britain tiin eksaisai an ngei hna lai. Ralkap 700 hrawng zong an i tel tiah theih an si.
Taluk hi a lung an fahter sual te hnga maw a timi zong an um. North Korea chak rengh ding in Taluk cu an fial lengmang lio a si. Ram pakhat nih ralkap eksaisai a tuah lengmangmi nih ramdang zong an lung a rak hrinter tawn lengmang. Nai hrawng US ralkap eksaisai tuah a tam ngai.
Asinain Australia a siah South Korea le Japan a siah cun a ra laimi an tuah laimi zong a hlankan in timhnak kan rak ngeih cangmi an si an ti. Naite ah Taluk nih a raltuknak vanlawng phurtu thar a vun langhtermi nih US le Japan lungre a vun theihter ngai cang. France zong aa tel fawn.
Pacific Islands chung i New Caledonia le French Polynesia Islands tbk cungah nawlngeitu ah France zong aa tel ve. Tutan ah Japan a rak tlawnmi hi a sawhsawh a si lo an ti. North Korea hrocernak zong aa tel, Taluk kut in a rili runvennak zong aa tel, US a tan pinak zong aa tel an ti.
Taluk le France hi sipuaizi pehtlaihnak thawng ngai an ngei ko nain France le Britian hi Japan he an i pehtlaihnak a thawng chin lengmang. Japan hi Taluk dah ti lo cun Asia ahcun a thawng bik ti thazaang a ngeimi pakhat a si.
France raltuknak tilawng cu Japan ah May 5 tiang a um lai. Helicopter 35 aa kan hna i raltuknak vanlawng pali le ralkap a za leng aa phurh chih hna. Japan rili inn Sasebo a rak phanh in Japan hngakchia nih laam in an don i, US le Japan upa zong an i tel hna. Ref: Reuters.