1945 ah Ralpi Pahnihnak a rak dih i, Korea cu Japan kut in 'Allied Ram' hna sinah a rak phan. Germany a rak i then bantukin Korea zong then hnih ah ser an si. Soviet Union nih Chak Korea an tlaih i, US nih Thlang Korea an tlaih. Caan karlak chung te lawng caah then i fonh than te ding in timhnak an ngei.
Thimnak tuahter hna i fonh than te ding an si. Asinain 1948 ah Kim II Sung, communist leng tang nih Soviet Union hruaitu hna cu a rak forh hna i thimnak um kho loin khua an rak khan than. 1948 a dongh leiah cun ram hnih - South le North - tiin then cheu thai an si.
Thlang Korea cu The Republic of Korea tiin democracy phung in thimnak an tuah i President Syngman Rhee a rak tling. Chak Korea cu The Democratic People’s Republic of Korea tiah an auh i Kim II Sung nih Soviet Union bawmhnak in a rak hruai hna.
1949 hrawng in cun US ralkap nih South Korea cu an rak chuah tak cang. Cuticun cozah hruainak in a siah ralkap thazaang in a siah fekfuan lo ngaiin an rak chuah tak hna tikah harnak tam tuk an rak tong. North Korea tu cu Soviet Union le Taluk nih an dirkamh hna tikah tangka in a siah ralkap thazaang in a siah an rak thawng tuk.
Kum hnih chung hrawng cu an pahnih karlak ah dong loin ral an tho i buainak in an rak khat. Thisen luan kum tiah an rak auh. North Korea ah Kim II Sung a dohtu paoh kha an rak thah hna i an tlaih hna. South Korea leiah a runrun in an rak zam hna. 1961 hrawng in cun North Korea ah Kim II Sung a dohmi an um ti lo.
A dohtu paoh cu an rak thianh dih pah ngawt cang hna. Zeitin dah North Korea uknak le muisam a ser ti ahcun Soviet Union chan i Joseph Stallin phung le lam kha a rak zul. Ralkap le setzung ser lawng te a rak rian. Meihol setzung hi biatak tein a rak sermi a si. Soviet leader Nikita Khruschev a siah Mao Zedong Cultural Revolution a siah Stallinist phun le lam cu an rak hlawt diam cangmi a si.
1970 hrawngah cun an meihol setzung hlawh a rak tling tuk. Asinain a ruah hlanah a meihol man a tla i mangtam nih a rak den chinchap hna. Ramchung minung harsa ngaiin khua an rak sa. International community nih an rak bawmh hna. Khatlei ah a innpa hna cu technology leiin an rak thangcho thluahmah cang. Ramdang ah tangka cawi in a sipuaizi ser than a rak timh.
1970 le 1980 hrawng in cun South le North Korea karlak ah theihthiam lonak a zual chin lengmang cang. Ramdang zong nih North Korea an hlat chin lengmang cang. Nuclear program kongah a buai chin lengmang. 1990 hrawngah na nuclear program hi ngol law zinaan le bawmhnak kan in pek lai an rak ti. 1991 ah UN ah a rak lut; South Korea zong a rak lut ve.
Asinain international community leiin bawmhnak cu a cohlan nain a nuclear program a ngol hlei lo. A biakam pakhat hmanh a zul lo. July 4, 1994 ah ruah lo piin lungtur in Kim II Sung a thi. A fapa Kim Jong-il nih a pa rian a tlaih colh. Ralkap hi a uar tukmi a si caah communist uknak in ralkap uknak ah a ram cu a thlen than. Hi hrawng hi mangtam le tilian an tong lengmang.
A ramchung mipi cu ramdang bawmhnak in an paw a cawm hna. 2005 ah ruah lo piin vawlei tang nuclear hneksaknak ka tuah khawh cang tiah thawngthanhnak a tuah. International community he dong loin an buai cang. Human rights an buarnak dong loin vawleicung ram kip an rak thang lengmang fawn. December 17, 2011 ah Kim Jong-il a thi. A fapa Kim Jong-un nih nawlngeihnak a tlaih than.
A pu Kim II Sung bantukin a hrang i a ramchung ah dohtu le ral an si tiah a ruah i a hmuhmi hna paoh cu a hloh thluahmah ve hna. Nuclear le missile program nih an molhter i nihin tiang dong loin ramdang he entainak a tong lengmang. Uknak a tlaih kaa hrawngah cun a hruai kho ngai hnga maw an ti, asinain nihin tiang ahcun fek thup in a ram a hruai khawh rih.
Zeitin tiang dah a kal pi khawh te lai timi an zoh cuahmah lio a si. President Trump cozah he fak ngaiin entainak an ngei. Nuclear hriamnam in a hrocer hna. Taluk hi North Korea hrihhram pi a si caah US nih Taluk cawlcangh an zoh cuahmah lio a si. Taluk nih tha tein a tlangtlak khawh lo ahcun US nih direct in an tlangtlak men te lai tiah zumh a si.