Zarhpini ah North Korea State media nih US raltuknak vanlawng phurtu tilawng kan thlak lai tiah a hrocer hna. US ralkap inn pi Pentagon leiin an vun leh colh hna. 'Fak chin lengmang in buainak ser i tim lengmang hlah' tiah phenhei cangmi Communist ram cun an vun cak.
Pentagon leiin biachimtu Gary Rose nih 'hrocernak le buaibainak biachim i sum ding in North Korea kan in sawm. International phunglam zulh ding le fak deuh in biaruhnak ngei ding in kan in sawm fawn. North Korea phungning lo nuclear program hi fiang tein US himnak caah ral a si' tiah a chim chih.
Philippiines pawngah Japan raltuknak tilawng le US raltuknak tilawng eksaisai ngei ding in timhnak an ngeih cuahmah lio a si. North Korea newspaper Rodong Sinmun nih zarhpini ah a tialmi cu 'an raltuknak tilawng thlak ding in kan ralkap thazaang timh cia in a um cang.
Voikhat kahnak in kan thlakpiak hna lai' a ti. A thawng tukmi kan hriamnam hydrogen bom hi US zong a kap kho i Asian ram hmun kip zong a kap khomi a si' tiah a tial chih. US State Department zong nih zarhpini ah a chimmi cu Norh Korea hrocernak hi direct in tuanvo lak ding in kan i tim cang. North Korea nih kan thin a kan hunter caan hi a luan cang i a tihnung tuk cang.
International community hna he hmun khat ah Kim Jong-un sualnak le human rights buarnak vialte hna hi a man kan liamter cang lai. Ram pehtlaihnak in kan rengh lai, security in kan rengh lai, sipuaizi in kan rengh lai. Nuclear program ka hlawt lo ahcun ka ram caah nun a fawi timi kan theihter lai tiah a chim.
'Ralkap buainak ser kan tim lo. North Korea hrocer zong kan tim lo. Asinain kanmah kan siah kan hawile an siah thihpheih kan ton ahcun a herh ning kan lehrul lai. North Korea he biaruahnak ding kan i ong ko. Asinain North Korea nih a ziaza i remh seh law a nuclear program hi hlaw seh' tiah a chim chih. Ref: CNN News.