Nirukni zing i North Korea nih missile a hneksak than hnu cun President Trump lung a dong cang. "North Korea he fak ngaiin doh lam ah kan um ko cang' tiah a chim. Taluk lungre a thei colh. 'North Korea buainak hi kan kut cungin a chuak te khomi a si' a ti ve.
Reuters ah Trump nih a chimmi cu 'North Korea buainak hi daihnak tein donghter ka duh. A thar in sipuaizi phihnak in kan tuah men te lai ka ti. Ralkap lam hi kan duhmi zong a si lo; kan timhmi zong a si lo. Asinain 'ralkap lam a um cang. North Korea he buainak fak kan tong te ko lai' tiah a chim.
Inn Raang ah biahalnak an tuah lioah Reuters biahaltu sinah a chim thanmi cu 'North Korea buainak hi biaruahnak tein donghter le daihter kan duh, asinain a har tuk cang. North Korea hi vawleicung caah zuamcawhtu taktak dirhmun ah a um cang' a ti.
Taluk Foreign Minister Wang Yi nih 'thinphan dai lo a si cang. North Korea buainak hi a karh chin lengmang khomi zong a si i, kan kut cungah a luan sual te ko lai' tiah Russian diplomat he UN tonnak ah a chim. Trump nih Taluk Presiden Xi zong a chonh. North Korea hi na rengh deuh a hau rih a ti.
'President Xi hi 'mi tha a si' tiah Trump nih a thangthat. Trump nih a chim thanmi cu 'Xi zong aa zuam lengmang ko tiah ka zumh. North Korea rengh khawh aa zuam ko lai ti zong ka zumh. A zuam zong aa zuam kho lomi a si. Asinain thil pakhatkhat cu a tuah te ko lai' tiah a chim.
State Secretary Rex Tillerson nih nilini ah a chimmi cu 'Taluk nih nuclear hneksak lo ding in a rengh ko. Na hneksak ahcun fak deuh in dan kan tat lai tiah Taluk nih North Korea zong ralrinnak a pek cang ko' tiah a chim.
Taluk Foreign Ministry biachimtu Geng Shuang zong nih a chimmi cu 'UN Security Council biachahnak kan tuahmi leng tiang kal lo ding in kan chimh cang. North Korea zong nih aa fiang tuk ko. United States zong cucu kan chimhmi hna a si ko' tiah a chim. Ref: Reuters.