Zarhpini ah Russia, Iran, Hezbollah le Syria cozah a dirkamhtu hna ram pumhnak an ngei i US mawhchiatnak bia an chim. Syria a kahmi a ngol lo i a pehzulh than ahcun kan lehrul cang lai tiah hrocernak ca an chuah.
'Syria Airbase a kahmi hi hramhram namneh lawng si loin red line vialte a tan dih. Hi hnu ah an kah than ahcun fak tuk in kan lehrul cang lai tiah an cachuah ah an tial chih. Fak ngaiin an tial thanmi cu 'zeitluk in dah lehrulnak thazaang le thil ti khawhnak kan ngeih timi US nih fiang tein a kan theih' an ti.
Ningani zing i US nih Syria Airbase a kahmi cungah an lungtlin lonak le an lungfahnak fak ngaiin an langhter. Sivaidat hriamnam a hman ruangah sualnak ngei lo mipi le hngakchia 86 an thi. An thih ning zong zoh ah khuaruahtam an si. An hmanthlak nih US thin a hunter tuknak a si.
An cachuah ah an tial thanmi cu 'Khan Sheikhoun a kaptu hi ramdang an si. Syria kah duh ah Syrian cozah an puhmi hna a si' an ti. Zarhpini ah President Putin nih Iran President Hassan Rouhhani phone in a chonh. Syria a kahmi hi International phung buar a si an ti. UN ah fak piin kan doh lai tiah hnatlaknak an ngei.
Iran President Rouhani nih a chimmi cu 'Syria an kahmi cungah tapung lung a tling tuk. President Trump cungah an lunglawmhnak an chim. Tapung a dohtu Syrian ralkap zeiruangah dah na kah hna? Zei bantuk phung le nawlngeihnak in dah na missile in ramdang na kah hna? tiah TV bia a chim lio ah Trump cu a phomh len.
Syrian President Assad zong phone in a chonh i Iran nih kan in dirpi ko tiah thazaang peknak bia a chimh. Israel PM Netanyahu nih zarhpini US a dirkamhnak a vun chim than. US nih Syria sivaidat hmanmi a kahmi hi a herhmi zong a si i, a hmaanmi zong a si. Israel nih kan in dirpi ko hna tiah a chim. Ref: TOI.