Zarh fatin zong in missile kan hneksak lai; thla fatin zong in kan hneksak lai; kum fatin zong in kan hneksak ko lai tiah North Korea Vice-Foreign Minister Han Song-ryol nih BBC ah a chim. 'US nih a kan kah ahcun ral pi kan tho ko lai' tiah a chim chih.
Tuan deuh ah Vice President Mike Pence nih 'US ralkap thazaang hi kan hneksak hlah u' tiah South Korea a tlawn pah in a chim. North Korea cungah kan lungsaunak caan a dih cang tiah a chim chih.
Mr Han nih BBC ah a chim thanmi cu 'US nih ralkap in a kan kah ahcun kan lam le kan style tein nuclear in kan phomh ko hna lai' a ti. International community nih Noth Korea missile hneksak le nuclear hneksak hi an doh lengmang nain an thinh hlei lo.
North Korea nih US telh chih in vawleicung ram kip a phan khomi missile hriamnam ser chin lengmang an i tim. President Trump nih cun 'an ser kho lai lo' a rak ti. Asinain 2020 in cun North Korea missile nih US a kah khawh cang lai tiah an zumh.
Mr Han nih BBC ah a chim thanmi cu 'kan nuclear hriamnam hi kan ram a runvengtu a si. US kut in zong a kan runven. US nih daithlaang tuk in a ralkap a hman i a kan kah ahcun ral pi kan tho colh ko lai. Hramhram in namneh hmangmi ram tuk kan duh lo' a ti.
UN ah North Korea ambassador Kim In-Ryong nih 'Syria an kahnak le a raltuknak tilawng a rak thlahmi cungah a lungtlin lonak fak ngaiin a chim. 'Vawleicung daihnak le himnak caah buainak sertu an si. A kan kah ahcun kan nuclear in kan phomh colh ve hna lai' a ti.
Russia nih North Korea le US zong ralrinnak an pek hna. North Korea nih a missile a hneksak lengmangmi hi kan cohlang kho lai lo. US nih hramhram in a thazaang a hmanmi zong hi a tihnung tukmi lampanh a si' tiah Russia's Foreign Minister Sergei Lavrov nih a chim.
'Zeihmanh na hneksak ti lai lo' tiah Taluk nih North Korea zong a chimh cang. Pakhat le pakhat thinhunternak le entainak donghter cang u. Hi bantuk hi mei chungah zinaan toih bantuk a si' tiah Taluk Foreign Ministry lei bachimtu Lu Kang nih a chim. Ref: BBC News.