Taluk nih amah kut tein raltuknak vanlawng phurtu a sermi cu nithumni ah an vun phozar cang. Asinain 2020 hlanah cun a hmang kho rih lai lo tiah an zumh. A min zong a sa rih lo. 2013 in ser hram an rak thok i, 2016 ah an lim. 'Kanmah tein kan sermi a si' tiah State media nih a chim.
US raltuknak vanlawng he tahchun ahcun technology leiin a niam deuh rih ko, asinain Taluk caah an hlawhtlinnak hleikainak hram pakhat a si cang tiah Sydney Lowy Institute i Seniro professor Sam Roggeveen nih CNN ah a chim.
North Korea le US karlak buainak a linhsat tuk lioah Taluk nih a raltuknak tilawng thar le thazaang a vun langhtermi nih Asia ah tampi bia a chim than lai. Atu cun rili chungah an thlak cang i rili chungah an thlak cang hnu cun a lim cang ti tluk a si, asinain remh ding tampi a ngei rih.
Atu lio an hman cuahmahmi raltuknak tilawng Liaoning hi Ukraine ah 1998 ah an rak cawkmi a si. Asinain an remh cikcek than i an hman taktak hi cu 2012 ah a si. Taluk nih a ralkap le hriamnam caah a hmanmi tangka hi vawleicung ah a tam cem a pahnihnak a si. Kum khat ah 4148 billion an hman i 2017 in 7% a karhter than.
US nih raltuknak vanlawng phurtu hi 10 a ngei i, pakhat an ser cuahmah lio a si. Taluk hi a tu an ser thanmi he pahnih an ngei lai. Asinain Taluk nih raltuknak vanlawng phurtu panga-ruk tel cu kan ngeih a hau an ti. Japan he an i cuhmi South China Sea cungah mual a ngei chin lengmng cang lai tiah an zumh.
Taluk hi ralkap thazaang in a siah sipuaizing thazaang in a siah vawleicung ah a thawng bik si ding in aa zuam cuahmah lio a si. Vawleicung politics zong ah a hmual thawnnak le ngeihnak a langhter chin lengmang cang tiah Hong Kong University ah Professor Yvonne Chiu nih a chim. Ref: The CNN News.