Nilini ah Afghanistan in nichuah leikam ah US nih ISIS vawlei khur pathum le hriamnam an phomhpiak hna i ISIS 36 an thi tiah Afghan Ministry of Defense leiin an chim. US nih an hmanmi bom hi 'Mother of all boms' an ti i, 'bom vialte hna i an nubik' ti a si.
Mipi khawndennak a um lo. Pakistan ramri pawng i Nangarhar peng ah a si. ISIS hmun ah GBU-43/B Massive Ordinance Air Blast bomb (MOAB) kan thlak tiah US ralkap upa nih CNN ah an chim. US nih a voikhatnak a hmanmi a si. Voikhat an rak hneksak cang. Nuclear bom a si lomi ahcun a thawng cem a si an ti.
Bom an thlak ah hin meng khat le a cheu hrawng a hlami khuami pakhat nih CNN ah a chimmi cu 'a thang tuk hringhranmi bom thawng kan theih. Kan inn thlalangawng zong an kuai dih. Kan tih tuk i ka nupi le ka fale cu an tap. Kan inn hmaiah hlah maw a can tiah kan ruah' a ti.
President Trump nih a chimmi cu 'nilini kan kahmi hi kan hlawhtlinmi dang pakhat a si' a ti. Atu tiang President Trump nih a kahmi hi Yemen tapung, Syria airbase le Afghanistan an si cang. Yemen tapung an kahnak US ralkap pakhat a rak thi. Afghanistan hmunkhur ISIS doh hi an i harh ngaimi a si.
Afghanistan ambassador Mohib nih a chimmi cu 'ISIS nih vawlei phummi bom tam tuk an chiah caah hmai fonh kan i harh tuk' a ti. Afghanistan hmunkhur ISIS an dohnak a linsa chin lengmang cang. President Trump cawlcangh zong hi a tei kho ti lomi an um cang.
Nilini bom a hmanmi hna hi cu a thawng tukmi a si. Trump a thangthatmi an um lioah a lunghrin pahmi zong an um cang hna. Dong loin raltuk lengmang cu tiah US upa cheukhat cu an lungre zong a thei pah cang. Ref: CNN News.