Taluk nih a raltuknak tilawng le vanlawng pawl hna zong timh cia in a chiah chin lengmang cang hna. US ralkap upa nih an chimmi cu 'Taluk nih a raltuknak vanlawng phurtu tilawng zong timh cia in a chiah cang hna. A raltuknak vanlawng zong ralring tein an um cang tiah an chim.
North Korea ramri leiah a raltuknak tilawng zong a thlah hna. A raltuknak vanlawng zong timh cia in an um cang. North Korea nih nuclear in US a hrocer hnu cun thinphannak lawng in an khat cang hna. Nuclear raltuknak a chuahter sual lai ti zong an phang ngaingai.
US official leiin a chim thanmi cu 'Taluk ralkap cawlcangh ning le timhtuahnak a linsa ngaingai. North Korea le US karlak ah poipang thil cang sual seh law tiah cawlcanghnak ngei kho colh ding in an i tim cia dih cang tiah CNN ah a chim.
US le North Korea hrocernak a vun linhsat i nuclear hriamnam hman ding in timhnak an ngeih hrawngah khan Taluk nih a ralkap 150,000 hrawng North Korea ramri ah a thlah hna. North Korea leiin a rak lut ding refugee hrimhrim hi an tam tuk lai tiah an zumh.
Taluk hi North Korea hawi tha cem a si i, Taluk nih a dirkamh zungzalmi a si. Tutan US le North Korea kongah cun North Korea cungah a lungtling lem lo. Nuclear hriamnam hman ding in a chim lengmangmi nih Taluk lung a tong lo ngai. Tuan deuh ah khan Taluk Foreign Ministry Lu Kang nih a mawhchiat hna.
President Trump nih North Korea hi na rengh khawh lo ahcun kanmah nih kan rengh cang lai tiah Taluk cu ralrinnak a pek cang hna. North Korea na rengh khawh ahcun US le Taluk chawlehthalnak a let in a tha lai tiah Trump nih a kamh hna ruangah Taluk zong a thatho ngai. Nai hrawng cu North Korea a renghnak a vun lang cang. Ref: The sun.