Russian President Putin le President Tump phone chonhnak an ngei. North Korea le Syria kong an ceih. US nih North Korea a phomh tak sual lai tiah Russia zong a lungre a rak thei ziar. Thinphan lo awk a tha lo. Nai hrawng US nih North Korea a hlathlai ning a zual chin lengmang cang.
South Korea he an raltuknak vanlawng eksaisai tuah ning hrimhrim cu a mak ko. North Korea hi kap duh taktak hna seh law vate bu hlawm in an hlawm ko lai. Tapung le thil sining hlathlainak caah an hmanmi Drone zong a thlah hnawh.
Russian President Putin nih Tump zong a rak chawnh colh. North Korea kongah rak i sum ko tiah Putin nih a fial. A thatnak in kan sersiam ti hna lai a vun ti than. Syria a kah hnu khan cun Russia a lungtling ti lo. North Korea ramri hrawngah Russia nih a ralkap a thlah lengmang nain US sinah zeihmanh an chim duh lo.
Asinain US cawlcangh nih a lauter cang hna caah atu bantukin a rak chonhmi a si. Hamburg ah G20 tonnak a ngei ding an si i, hmaitonh in an i tong te lai. An phone chungin Syria kong zong an ceih. Syria ramchung buainak donghternak lam zong kan kawl ti lai tiah hnatlaknak an ngei.
Nithumni le nilini ah kahdaihnak tuah pi hna ding in Syria ah kan minung zong kan thlah hna lai tiah Inn Raang leiin an chim. Middle East tapung riantuannak le cawlcanghnak zong kan doh ti lai an ti. North Korea kong zong an ceih. 'Rak i sum ko. Buainak le entainak cu linhsatter ti hlah u.
Hmun khat ah daihnak le remhnak in North Korea nuclear kong cu kan donghter ko lai tiah Putin nih a chim. A voithumnak phone an i chonhnak a si cang. Syrian Airbase an kah hnuah a voikhatnak an i chonh a si. Russian leiin an chimmi cu 'thil tha tampi a chuahter dingmi biaruahnak an si' an ti.
US nih Syria a kah hnu khan cun Russia lung a fak ngai nain US pi a vun i hro taktak i a thazaang a vun chuah taktak hin cun an lungthin an thumh thluahmah than ko hna. Ref: The sun.