US sungthoh CIA le South Korea sungthoh Intelligence Service (IS) nih 'bio-chemical thilri' in kan ram hruaitu Kim Jong-un thah an timh tiah North Korean state news agency KCNA nih a tial. North Korea ralkap kum 83 an tlin camtuak ni ah thah an timh a tiah a tial chih.
An tial thanmi cu 'Kim Jong-un thah an timhnak ah North Korean minung pakhat zong aa tel i, an hmanmi hriamnam hna cu biochemical, radioactive le sivaidat tha lo hna an si a ti. Asinain South Korea sungthoh lei nih cun 'zeihmanh thah an timhnak kan theih lo' tiah CNN ah an chim.
North Korea hi a luan cia hrimhrim in a hmaan lomi sualpuh an hmang cang. North Korea media KCNA nih a tialmi cu 'CIA le IS nih North Korean pa cu tangka le hriamnam an pek i Kim Jong-un thah an fial a ti. KCNA nih an tial thanmi cu '2014 in an rak hman cangmi a si' a ti.
North Korean minung an hmanmi hi Russia in nichuah lei kam ah rian a tuanmi a si. South Korean le US sungthoh he April 20 tiang pehtlaihnak an ngei. April 15 ah Pyongyang ah North Korean ralkap cernak a ngei ding an si i, mah ah hin Kim a rak lang te lai i kan thah te lai tiah timhnak an ngei.
Asinain Kim Jong-un thah an timhmi cu a tlamtling lo. Zeitin dah Kim Jong-un thah an timh, zeitin dah CIA le IS nih North Korean pa an hman ning a si timi an langhter lo. Cun Kim thah a timtu cu an tlai kho maw tlai kho lo ti zong an langhter ti lo. Norh Korean cungah zeidah a cang timi zong an langhter thai lo.
North Korean news nih a tialmi a hmaan ahcun CIA le IS nih an hmanmi North Korea pa hi an tlaih tinak a si lai. Ref: CNN News.