North Korea hrocernak nih zeitik ah dah US thin a phawh taktak te lai? Zeiruangah dah US hi mah tluk in a lung a sau? North Korea hi an tih caah maw hitihin an zoh sawhsawh peng? Atu zong US kan kah ti langhternak caah nuclear kan hneksak than lai tiah a thanh cang.
US he kan i ngiar cuahmah lio a si bantukin atu zong kan nuclear kan hneksak than lai. Kan hruaitu Kim Jong-un nih a ni le caan le a hmun a kan chimh in America kan kah ti langhternak caah kan nuclear kan hneksak than lai tiah thawng an thanh cang.
Hi bantuk biachim hi US hmaiah bengh tluk a si cang. Naite ah President Trump nih ralkap zong kan hman te ko lai. Caan nih biachim te ko seh tiah Reuters biahaltu hna sinah a chim cang. Asinain a chim tlawmpal ah atu bantukin North Korea nih nuclear hneksak ding in a vun chim than.
Atu lioah cun North Korea hi US ca lawng si loin Asia ram vialte caah a tihnung tuk cang tiin an hmuh. Asian ram kip ah thinphannak lawng te a leng cang. North Korean Vice foreign Minister Han Song Ryol nih a chimmi cu 'a thawn khawh chung thawng in kan nuclear thazaang kan pek lai' a ti.
A chim thanmi cu 'kan hruaitu Kim Jong-un nih a tuah u a timi paoh kan tuah lai. Nuclear thazaang in kan i thuam lai i, namneh hmang American hi kan kham lai' tiah a chim chih. President Trump nih cun 'North Korea nih a hneksak than ahcun kan lungtling ti lai lo' tiah CBS News ah a chim.