Georgia i Gainesville khua ah motor pahnak a um i Hannah Simmons, 23, le a fanu A'lannah le an hawi nu Lauren Buteau, 28, an thi. Nawlngeitu nih an chimmi cu 'sizung in an rak tin leiah motor nganpi truck he an i pah' an ti. Riantuannak a kalmi nu pakhat nih a phone in hman a thlak.
Motor tam tuk a tapter hna caah riantuannak a kalmi zong an tlai dih. Anisa Gannon nih a riantuannak hmun a phak hnuah motor pahnak hmaan a thlakmi cu a zoh than. Khuaruahhar tuk a hmuhmi cu motor pahnak hmun ah van cung kainak lam pakhat a lang.
Van cung in ceunak a rak tlami tung bantukin a um. Motor pahnak ah a thimi hna pathum van cung kainak a si lai tiah a zumh. A hnuah a pi Tara Noble zong a zohter in an khuaruahhar tuk.
Ms. Noble nih ngaihchiatnak tong chungkhar a pehtlaih colh hna i a thimi Hannah a nu Judy nih cun 'hi hmanthlak hi kan laksawng a si' tiah a chim. 'Hmaan nan rak thlakmi hi sullam a rak ngei ko. Ka hnangam cang. Ka fanu Hannah le ka tunu nih van in an kan zoh cang lai'a ti.
A thimi Hannah a ta Paige Wilson zong nih a chimmi cu 'hi thil a cangmi hi hmelchunhnak pakhat a si ko. Ka hnangam ve cang lai. Hmun nuam le hnangamnak ah an um cang tiah a chim. An chungkhar Jodie Carter nih 'Pathian nih vancung ah a lak cang hna' tiah a chim ve. Ref: The sun.