Nizan zarhpini ah North Korea nih 'missile kan hneksakmi cu meng 1,200 a kal kho. Nuclear zong a phor khomi a si' tiah a chim. Tuaktan kho dangdang zong nih an chim tikah tutan a hneksakmi cu a hlan naak in a thangcho ngai cang an ti cio. US zong an lau ngai cang.
US Defence Secretary Jim Mattis nih a chimmi cu 'North Korea hi ralkap in kan lehrul hna ahcun tihnung tukmi rawhnak kan phan lai. Kan ruahnak leng tiang in thil a cang lai' tiah a chim. A chim thanmi cu 'UN, Taluk, Japan le South Korea tu hna he riantuan ti i daihnak kan zuam a hau cang.
Taluk nih North Korea cozah a rengh lengmangmi zong hi thathnemnak a ngei ko' tiah a chim. Raltuknak chuak seh law S. Korea ah million 10 hrawng ummi caah tih a nung tuk. North Korea Deputy U.N. Ambassador Kim nih cun 'atu kan buainak hi US ruangah a si' tiah fak ngaiin US a phomh hna.
'US nih ICBM a hneksak i S. Korea he ralkap eksaisai an ngei lengmang. Raltuknak chuak seh tiah timhnak bantukin a si. Kan hneksak lengmang rih lai' tiah a chim. Asinain US nih cun kan missile hneksak le North Korea hi aa tlaihnak pakhat hmanh a um lo.
North Korea kan ngiar duhnak hna zong a si lo. A hlankan in timhnak kan ngeih cangmi an si. North Korea tu cu kanmah thihpheih duh le a inn pa hna thihpheih duh ah a hneksakmi an si tiah Joint Chiefs of Staff General Chairman Joseph Dunford nih a chim. Ref: VOA News.