Zarhpini ah North Korea nih missile a hneksak than tiah South Korean ralkap upa nih an chim. South Korean president thimnak an dih ni-hnih thum ah a hneksak colh. South Korean President Moon Jae-in nih cun biaruahnak in N. Korea nuclear kan ngolter lai a ti.
Asinain North Korea nih missile a hneksak thanmi cu US le South Korea caah dawnkhaantu ngai a si cang lai. South Korea nih National Security Council a auh colh tiah President biachimtu nih a chim. 'Kan ralkap nih neih tein an ngiat peng ko hna. Timh cia in kan um ko' tiah a chim.
Kusong khua in an thlah i meng 435 hla a kal tiah South Korean ralkap upa nih an chim. Zei bantuk missile dah a si timi kan hlat cuahmah lio a si. Lamhla a kap khomi ICBM cu a si lai ti kan ruat lo tiah US ralkap upa pakhat nih a chim.
North Korea nih a hneksak thanmi cu Taluk zeirel lo ngai a si cang an ti. Missile an thlahmi hi Japan le Korea ramri ah a tla. International community nih an thloh tuk bu le ralrinnak an pek tuk buin a hneksakmi a si. Kan cohlanpiak lo. Fak piin kan dohnak kan langhter' tiah Japan PM Shinzo Abe nih a chim.
Japan caah a tihnung tukmi zong a si i UN biachahnak zeirel lo zong a si tiah a chim chih. April 29 ah a rak hneksak i an thlah tlawmpal ah a puak colh. US le Taluk nih ralrinnak an pek tuk i a dai cang lai an ti lioah a vun hneksak thanmi cu thin a phawh ngai cang ko lai.
US le Taluk leiin zei hmanh an chim rih lo. Ref: CNN News.