Russian Presdent Putin le Taluk President Xi tonnak an ngei. North Korea missile hneksaknak kong zong biatak tein an ceih. An lungretheihnak zong an langhter veve tiah Putin biachimtu Dmitry Peskov nih report tu hna sinah a chim.
Taluk official news Xinhua nih a tial ning ahcun 'pawngkam ram daihnak le vawleicung daihnak caah Russia le Taluk nih tuanvo nganpi kan ngei' tiah Russian President sinah a chim tiah a tial. Kap hnih in North Korea missile hneksaknak kongah zeitin dah tuanvo kan lak lai timi zong an ceih chih tiah a tial.
Asinain zeitin dah North Korea cungah rian kan tuan lai timi an ceihmi cu an langhter lo tiah Xinhua nih a tial than. Atu hi Taluk ah Russian President Putin telh in vawleicung ram hruaitu zeimawzat tonnak an ngei i Asia in Europe in Africa ram tiang zeitin dah chawlehthalnak pehtlaihnak rian kan tuan lai timi an ceih lio a si.
Tu zing (zarhpini) ah an meeting onnak zong an tuah. Tutan an ceih dingmi chawlehthalnak kong hi a lian ngaingaimi a si an ti. An meeting onnak an tuah dih caan karlak ah President Xi le President Putin zong tonnak an ngei i North Korea missile hneksaknak zong an ceih ti.
US President Trump nih fak deuh chin lengmang in dantat than ding in a chim cang. North Korea nih South Korean President thar Moon Jae-In a hneksak a si tiah cheukhat nih cun an ruah. Lee nih cun North Korea hi biaruahnak in a nuclear kan ngolter lai a ti, asinain missile a hneksakmi nih a biachim a danter cang.
Atu cun 'North Korea nih a ziaza a thlen lo ahcun biaruahnak cu a si kho lai lo' a ti cang. Japan zong an thinhung. Kan ram himnak caah a tihnung tukmi cawlcanghnak a si. Kan cohlang kho lo tiah fak ngaiin an mawhchiat than hna. Taluk nih cun 'i sum deuh ko hna u sih' tiah a forhfial hna.
North Korea missile hneksakmi a tlaknak hi Japan rili ah a si i, Russia in meng 60 a rak i hlatnak ah a si. Russia a hrocernak a si khomi a si an ti. Trump nih cun 'Russia vawlei he aa neih tuk cang. Russia a lungtling hrimhrim lai ti ka ruat lo' tiah a chim. Ref: TOI.