Nihnihni ah FBI nih Trump campaing tuahtu le Russian pehtlaihnak an hlat lengmangmi thawngpang thar a chuak. Trump nih FBI Director James Comey rian a phuahnak zong kha hi ruangah a rak a si. Russian he pehtlaihnak a rak ngeimi kha Micheal Flynn a rak si.
Micheal Flynn hi Trump nih National Security Adviser caah a hmanmi a si i, caan zemawzat chung a tuan hnuah a rian an phuah than. 'Lihchim a hmang' tiah Vice President Mike Pence nih cun a chim. American sungthoh nin cun sungthoh an timi Russian ambassador Sergey Kislyak he biaruahnak an ngeihmi Flynn nih a rak phuang thlu lo.
 |
| Russian Ambassador Sergey Kislyak; sungthoh zong a si tiah an zumh |
Russian he pehtlaihnak an ngeih tiang lawng si loin 2016 thimnak kha Russian le Trump campaign tuahtu kha bawm in rian an rak tuan ti tiah an lunghrinh hna. Russia nih US thimnak ah an duhmi tlinter ding in an rak i thlak ti zong kha a si tikah fak taktak in FBI nih hlathlainak an tuah lengmang. James Comey rianphuahnak tiang a phaknak zong a si.
A rian an phuah hlanah Trump nih Inn Raang ah Comey cu a rak auh i, Micheal Flynn le Russian pehtlaihnak nan hlat lengmangmi hi ngol cang tiah a fial. Trump nih a chimmi cu 'kal tak ko cang. Hlat ti duh hlah. Flynn zong mi tha a si. Na ngol cang lai tiah ka zumh' a rak ti.
 |
| National Security Adviser thing; Russian he pehtlaihnak a ngeimi Micheal Flynn |
Asinain James Comey nih a duh lo. An karlak ah linhsatnak a um lengmang i a rianphuahnak tiang a phan. 'Dinnak lam kham' a si tiah upadi lei kong thiam Jeffrey Toobin nih cun a chim. A chim thanmi cu 'campaign a tuahnak kong an hlathlaimi ngol cang u ti cu 'Watergate' bantuk a si a ti.
Richard Nixon nih 1974 ah campaign a tuahnak a hlathlaitu FBI kha a rak ngolter hna i Inn Raang in an rak phuah. US tuanbia ah a pakhatnak an phuahmi President a si. Cucu 'ramkhel thangchiatnak' (watergate) tiah an rak auh. President Trump zong Richard Nixon he aa khat bakte an si tiah an ruah chan cang.
 |
| Republican upa Senator Lindsey Graham |
Nihnihni thawngpang thar nih Congress upa vialte a tuaitam dih than cang hna. House biachimtu Paul Ryan biachimtu nih 'Comey nih thawngpang thar a chuahmi cu kan hal lai i House Oversight Committee nih kan zoh lai' tiah a chim. Congress ah Trump he biaruahnak an ngeihmi kan phuanter lai tiah Senator Lindsey Graham nih a chim.
Democrats upa an siah Republican upa an siah President Trump cozah riantuannak nih a tuaitam ngai cang hna. Trump hnulei ah a dir pengmi Republican upa zeimawzat pawl zong hi an celh lo caan a phan te lai tiah an zumh. Comey nih Congress hmaiah bia a chim tikah a fiang te lai. Ref: VOA News.