Vawleicung ram kip Khrihfami hremnak a tongmi kan dirkamh ko hna. President Trump a siah keimah ka siah hremnak a ing i a tuarmi Khrihfami hna caah thla kan campiak lengmang ko hna. ISIS hi kan hloh dih hna lai tiah Vice President Mike Pence nih a chim.
Minthang evangelist Franklin Graham hruainak in Mayflower Hotel ah World Summit In Defense Persecuted Christians timi vawleicung Khrihfabu hruaitu tonnnak an ngei. Vawleicung ah hremnak a tongmi Khrihfami runvennak le dirkamhnak kong an ceih.
President Trump hi 'kan biaknak zalonnak au pitu champion a si' tiah Graham nih a chim. Vice President Mike Pence nih a tel pi hna. 'Nan sinah ka rak i telmi hi Khirhfami runven ding in President Trump aa pumpeknak langhternak caah ka ratmi a si. Trump aiawh in a rami ka si' tiah a chimh hna.
Pence nih a chim thanmi cu 'Trump cozah nih a biapi in foreign policy kan ngeihmi cu vawleicung ram kip biaknak zalonnak runven ding hi a si. Biaknak le kan zumhnak hi kan runven lai. ISIS kan hloh dih hna hlan tiang in kan i din lai lo. Kan hloh dih hna lai' a ti.
Hremnak a tongmi hna sinah Pence nih bia a cahmi hna cu 'American mipi zong nih thla an in campiak hna i, President Trump zong nih thla an campiak hna i keimah zong nih kan campiak hna. Nan harsatnak le tuarnak nih American a kan thangh i din loin nan caah rian kan tuan lai' tiah a ti.
American Khrihfami hna sinah bia a cah thanmi hna cu 'President kan tuan chung paoh cu biaknak zalonnak kan dirkamh lai. America cu zungzal in thlangcung i a ceumi khua bantuk a si lai. Kan ram ah biaknak kip nih zalong tein an biaknak an au pi lai i, zalong tein biaknak an ngei lai' a ti. Ref: TCP.