American mipi nih zeitin dah President Trump an hmuh ning a si timi Poll pakhat hnu pakhat in an vun chuah hna i ni za le ni hleinga (115) chung President a tuannak ah a lar lo ngai timi a lang. Nikhatni ah Gallup nih an poll tuahmi an an chuah.
38% lawng nih President rian a tuanmi a tha ko an ti. Zarhpini ah NBC-Wall Street Journal poll an chuah than i, 39% lawng a si. FBI Director James Comey rian a phuah hlan deuh ah Quinnipiac University poll an chuah than i 36% lawng a si than.
53.8 hrawnghrang nih cun President rian a tuanmi a tha lo an ti. Mipi lung a tling lo timi a lang ngai. 2014 ah President thing Obama kha 39% ah a rak tla bal ve. Asinain a kai than colh. A hlanah President a tuanmi he tahchunnak kan zoh ahcun Trump hi a niam cem a si.
President an tuan ni 114-117 hrawnghrang an phak i poll an tuahmi hna an phuahmi ah Obama hi 64% nih a riantuan a tha an ti. George W. Bush kha 56% a si i, Bill Clinton kha 45% a si. Trump cu 38% lawng a si. Mipi nih Trump an hmuh ning a niam tuk cang caah Republican upa zong an lungrethei cang.
US tuanbia ah mipi nih President an hmuh ning poll a niam tuk ahcun caan karlak thimnak ah House ah a party chungtel nih thutnak sungh khawh a si. Atu hi House he Senate he Republican nih Democrats pawl an tei hna. Asinain Trump larnak a niam tuk ahcun 2018 caan karlak thimnak ah thutnak an sung te khomi a si.
1946 in President nih 50% hrawng lawng a hmuh ahcun a party nih House ah caan karlak thimnak ah thutnak 14 sungthoh khawh a si. Atu ning tein cun Trump poll a niam tuk caah thutnak 36 hrawng an sung kho men. Caan karlak thimnak hi ni 540 a tang cang. Ref: CNN News.