President Trump nih ram rum taktak a simi Saudia Arabia a tlawn hna cu tapung dohnak le hawikawmhnak tiang lawng si loin hriamnam kong tiang in aa tel chih. Trump le Saudia Siangpahrang Salam nih tam tuk man minthutnak zong an ngei.
Tutan minthutnak an ngeihmi ah hriamnam zuarhnak kong le chawlehthalnak kong hna an si. Iran hi Saudia Arabia caah tihnung ral an si zungzal. Tutan ah cun a ram runvennak caah $100 billion man US ah hriamnam cawk ding in min a thut cang. Hihi cu an pek colh hna lai.
Cun a dang in $350 billion man an thutmi a um i kum hra chungah tlamtlinter ding a si. 'Hi vialte ram runvennak thilri hna hi Iran in runvennak caah hman an si lai' tiah Inn Raang lei nih a chim. US lawng te nih tapung doh loin Saudia Arabia ram zong nih an doh cang lai.
Pakhat le pakhat ram himnak kongah bawmh ding le riantuan ti ding in hnatlaknak minthutnak zong an ngei. Saudia Arabia hi US sinah hriamnam a caw biktu ram pakhat a si. Tutan hriamnam cawk ding in min an thutmi ah tam ngai aa tel hna.
Tank, Helicopter, South Korea ah a chiahmi bantuk THAAD missile, rili runvennak tilawng, miakpi tbk dangdang an um len hna. Nizan nilini zong ah khan ralkap lei hriamnam company dangdang zong kan dirh rih lai tiah an thanh. Ram runvennak kongah a mit a au chin lengmang cang.
President Obama chan ah pehtlaihnak a rawk ngai cangmi a thar in thawnter chin lengmang ding in timhnak zong an ngei. US lei a siah Saudia Arabia leiin a siah kan i pehtllaihnak kan thawnter chin lengmang lai an ti. Ref: TOI.