Jew miphun hna pacan pakhat Siangpahrang David khuali pi Jerusalem cu ropui taktak in dum viar in an tamh dih cang. Muslim ram Jordan kut tangah caan sau pi a um hnuah Six Day War (1967) Israel nih an rak lak than. May 23, 2017 khi kum 50 a tlin kum camtuak an hmang lai.
Kum 50 a tlin kum camtuak zong lunghlai taktak in conglawmh an timh. Asinain International community nih cun official tein Israel ram ah an cohlang lo. Israel nih cun kan ram a si tiah an tlah an siang ti ve lo. President Trump nih US embassy kan chiah cang lai a ti i an lungtling tuk.
US nih a embassy thialpiak hna seh law Israel khuapi a si cang ti a cohlan bantuk a si cang hnga i Israel caah cun teinak ngai a si hnga. May 22-23 hi Israel ah Trump zong a rak tlawng lai i, kum 50 tlinnak camtuak an hmannak zong ah a tel pi hna lai. Embassy thialnak kong hna a chm te hnga dek maw.
Israel lei upa nih cun thaizing (nikhatni) ah President Trump a rak phan lai i, Tel Aviv in Jerusalem ah embassy thialnak thawngpang thar a kan phurh te theo lai tiah an hnabeisei ngai. Jerusalem hi Israel khualipi a si cang ti kan thanhpiak seh ti hi Israel upa hna chunmang a si.
Asinain Israel le Palestinian karlak ah daihnak ser hmasa lo cun buainak a linsa tuk lai ti an phang cio i Trump nih campaign lio a biakam hi a tlinter ngai te hnga maw tiah cheukhat cu an lunghring peng. Palestinian nih Jerusalem nichuah lei paang paoh hi an khualipi ah ser an duh ve.
Israel nih Jordan kut in Jerusalem an lak kum 50 tlinnak camtuak an conglawmh ni theng te ah President Trump nih a rak tlawn dingmi hna cu sullam a ngei ngai nain Israel a deuh tuk sual te hnga maw ti phan a um nga. Obama nih a rak deuh tuk cang hna i Trump zong nih a deuh tuk than hna ahcun an thachia ngai cang ko lai. Ref: TOI.