President Trump nih biathli a phuan than. US ralkap upa pawl an thinhung ngaingai ti a si. Trump nih Philippines President Duterte he phone an i chawnh lioah North Korea missile le nuclear kong an ceih. President Trump nih US ralkap biathli zong a chimh chih tiah theih a si.
US media pakhat The Intercept nih a tialmi cu Trump le Duterte phone chawnhnak cathlap a chuakmi (transcript) zong kan hmuh tiah a ti. North Korea kong an ceihnak ah President Trump nih Korea rili ah US nuclear phurtu tilawng pahnih kan chiah ko cang tiah a chimh a ti a si.
President Duterte nih a rak chimmi cu 'North Korea nuclear hi Asia caah a tihnung. Cucaah Trump zong na thin i sum ko tiah ka forhfial lai' tiah a rak chim. Phone an i chawnhnak ahcun zeitluk in dah Asia ram hna caah North Korea a tihnun timi kong an ceih.
Duterte thazaang peknak caah Korea rili ah an chiahmi kong cu a chimh dih. Ramchung drug a dohnak kongah Trump zong nih a thangthat len, asinain ramdang nih cun human rights a buar an ti i an mawhchiat ngai.
US ralkap upa nih cun an ralkap cawlcanghnak langhter an duh bal lo. Thlithup in umter peng an duh hna. Trump nih kan ralkap phung le zulh tawnmi lam a pialter chin lengmang cang tiah US ralkap upa nih an chim. Kan nuclear phurtu tilawng kong hrimhrim kan chim bal lo tiah an chim. Ref: The Express.