North Korea hrocernak le lungput hi zungzal in US caah tihnung a si cang. American mipi zong an lungrethei i Japan le South Korea in Asia ram tiang an lungre a thei. Atu zong nuclear kan hneksak than rih lai tiah an thanh cang. US a kahnak video deu zong a ser than.
Korea rili hrawng i US raltuknak tilawng hna cu a missile in a tinh hna i US nih a ka kah ahcun ka phomh colh hna lai tiah timh cia in a hriamnam a chiah dih cang. America ram pumpi zong a hninh dih cang.
US ralkap upa an siah Inn Raang lei upa an siah Congress lei upa an siah North Korea missile le nuclear hneksaknak le hrocernak hi kan cohlang kho ti lo an ti. Kan nunnak le kan himnak caah tihnung le ral a si tiah fiang tein an hmuh cang.
Japan le South Korea zong ah thinphannak le lungretheihnak lawng tein an khat cang. 'Kan zam manhnak ding a um lo' tiah Taxi mongtu pakhat nih cun a chim. Thuhnak zong kan ngei lo; zamnak zong kan ngeih lo. Kan i runvennak ding hrim a um lo tiah Seijiro Kurosawa nih a chim.
President Trump zong nih 'North Korea nih nuclear a hneksak than ahcun ka lungtling ti lai lo' tiah a chim. A hneksak than ahcun a zoh sawhsawhnak ding lam hrimhrim zong a um ti lo. A hneksak taktak ahcun US nih ruah lo piin a phomh tak te ko lai. Thim ding lam dang a um ti lo.
US ralkap lei upa nih an chimmi cu 'US kan ral tihnung bik cu North Korea a si cang' an ti. US zeihmanh ah a rel lo tukmi nih President Trump thin a phawh taktak te lai i, ruah lo piin a phomh te lai i, ralpi pathumnak a chuak te khomi a si tiah tuaktan kho nih cun an chim cang. Ref: The sun.