US First Lady Melania Trump nih mipi khuaruah a harter ngaimi pakhat a um. Saudia Arabia ah tlawn lioah a lu aa khuh lo. Muslim phung bantukin a luh aa khuh ve te lai tiah an ruah asinain aa khuh lo. Vatican i Pope an tlawnnak ahcun a lu aa khuh.
Trump fanu Ivanka Trump zong Melania Trump bantukin aa lu aa khuh ve. Zeiruangah dah Pope hmai vial ah an luh an i khuh?
Roman Catholic Khrihfabu inn pi a simi Vatican ah cun nu nih Pope an ton tikah angki bansau an i hruk lai, angki nak an i hruk lai, cun an luh zong an i khuh lai tiah First Lady communication Director Stephanie Grisham nih a chim.
Zeiruangah dah Saudia Arabia ah a lu aa khuh lo i Vatican vial ah a lu aa khuh tiah an hal i Grisham nih a lehmi hna cu 'Saudia Arabia ahcun thil hruk ningcang chimhnak a um lo. Cu bantukin na thil naa hruk lai timi ri khiah a um lo caah a lu aa khuh lonak a si a ti.
Asinain Pope hmaiah cun cu bantukin thil na hruk lai timi phung a um tiah a chim. Ramleng an chuah hlanah timhtuahnak tha tein an ngei hmasa. State Department nih an bawmh hna.
Ramleng chuah tikah umtu ningcang le thil hruk ningcang kongah thangchiatnak le mualphonak an ton lonak ding caah timhnak tha tein a ngei. Cucaah Pope hmaiah a lu puan aa khuhmi hi an phung ruangah a si tiah a chim. Ref: CNN News.