Senate Intelligence Committee hmaiah U.S. Attorney General Jeff Sessions zong bia an hal ve cang. Russian he pehtlaihnak a ngeih le ngeih lo kong an chimter. A bia a hrang i aa hrocer ning zong a fak ngai. Democrats upa pawl zong fak taktak in a phomh hna.
Trump campaign lioah Russian ambassador he pehtlaihnak a ngei i US thimnak pialter an timh tiah sual a kan puhmi hi 'fihnung tukmi lihchim le khuaruahhar tuk a si' tiah biahrang ngaiin a chim. Russian upa he ningcang loin pehtlaihnak le biaruahnak kan ngei lo' tiah a chim chih.
Sessions hi campaign tuah lioah khan Trump ruahnak petu a rak si. Russian ambassador Sergey Kislyak he tonnak voihnih an rak ngei. Cheukhat report nih cun voithum tiang tonnak an rak ngei i a voithumnak cu thlithup in Washington hotel ah an rak i tong tiah a report.
Sessions nih Senate Intelligence Committee hmaiah ah nihnihni ah a chimmi cu 'fiang tein kan chimh hna lai, 2016 thimnak kongah Russian upa he voikhat hmanh kan i tong lo, biaruahnak zong kan ngei lo' tiah a chimh hna.
SIC hmaiah a luan cia ninga ah khan James Comey zong biahalnak an rak ngeih. Russian he pehtlaihnak zong an ngei i US thimnak pialter zong an i tim ko tiah a chim. Asinain U.S. Attorney General Jeff Sessions nih cun 'fihnung lihchim' a si a ti.
President Trump he biaruahnak an ngeihmi kongah Democrats upa pawl nih bia an hal i a let duh hna lo. Democratic Senator Dianne Feinstein nih 'Trump sinah Comey hlathlainak kong na ruah bal maw' tiah a hal i, Sessions nih 'hi kongah ka chim khawhmi a um lo' a ti. Ref" VOA News.