President Trump nih FBI Director thing James Comey rian a phuahnak kong, Trump campiagn tuahtu le Russian karlak ah pehtlaihnak an rak ngeih ning kong, Russian nih US thimnak ah zeitluk in dah aa thlak timi kong hna cu nilini ah Comey nih a phuan cang lai.
Nilini ah Senate le House cu Capitol Hill, Congress ah pumhnak an ngei lai i, caan sau ngai an hngahmi thawngpang an theih cang lai. Hi ni le caan ah Trump nih a phuahmi FIB Director thing James Comey nih zeidah a chim hnga tiah American mipi nih an hngahmi cu theih a si cang lai.
Democratic leiin senator Tim Kaine nih a chimmi cu 'tihnungmi sualnak hlathlainak kong zong a si, tihnung tukmi sungthoh hlathlatnak kong zong a si, tihnung tukmi dinnak lam khamhnak kong zong a si. A bia tuk hringhrangmi a si i, bia hmaan kan theih hrimhrim a hau' tiah a chim.
2016 US thimnak ah zeitluk in dah Russian aa thlak timi le Trump campaign tuahtu le Russian karlak ah zeitluk in dah pehtlaihnak a um timi le zeiruangah dah trump nih Comey hi 'hlathlainak na tuahmi ngol ko' tiah a fial timi le zeiruangah dah Trump nih a rian a phuah timi fianternak a si lai.
Republican Senator Marco Rubio nih a chimmi cu 'kan herh cemmi cu media report lawng hi kan i bochan awk a si ti lo. American mipi theih in James Comey pumpak hrimhrim in information a ngeihmi a phuan cang lai. Upadi tangah aa hruaimi kan sinak cu hihi pei a si cu' tiah a chim.
'A biapit tuk khunmi cu Congress upa hna hmaiah James Comey nih biachim ding in a cohlanmi hna hi chim ding a ngeih caah a si ko. Chim ding cu ngeih hlah seh law biachim an sawmmi hi a cohlang duh hna lai lo' tiah senator Angus King nih a chim. Ref: VOA News.