London ah minung pathum nih motor in mipi an pah than hna. London i Finsbury park pawng i Muslim biakinn ah Muslim pawl thla an cam lioah an pahmi hna a si. Cu lioah minung pathum nih motor (van) in an pah hna i minung pakhat a thi.
Biakinn ah thla a cammi a kan ral caah a kan pahmi a si tiah Muslim Council General Secretary Harun Khan nih a chim. An pah lio hna a hmutu nih an chimmi cu minung pathum an si i pakhat cu an tlaih; minung pahnih cu an zam an ti.
An pah lio hna ah 'Muslim vialte ka thah dih hna lai tiah a mongtu cu a au' an ti. Zeiruangah dah a pah hna timi a fiang rih lo..
Minung pahra leng an i hliam. Cheukhat cu an i hliam ning a fak ngai hna. Police nih an chimmi cu 'minung pakhat cu an pah cangka in a thi colh' an ti. A mongtu minung pakhat kum 48 pa cu an tlaih i, minung pahnih cu an zam ti a si.
Prime Minister Theresa May nih cun 'tapung riantuannak a si ko' a ti. 'Tu zing ah poipang meeting kan ngei lai. Harnak a thongmi chungkhar cungah kan ngaihchiatnak kan langhter' tiah hnemhnak bia zong a chim.
UK hi tapung kut in an tuar taktak cang. Thla li chungah voili bakte an phomh cang hna. Ref: The sun.