Nizan nilini i FBI Director thing James Comey nih Congress upa hna hmaiah Russian le Trump campaign tuahtu pehtlaihnak kong a chimmi cu Trump caah sivang ngai a si lai tiah an zumh. Trump nih hlathlai ti lo ding in a fialnak le keimah ka tanh ko tiah a fialnak vialte a phuan dih.
President Trump nih caan zeimawzat a rauh hnuah twitter in a vun tial than. 'Comey biachimnak ah lihchim le a hmaan lomi bia aa tel len ko nain an zumh dih. Wow Comey hi thlithup biaphuangtu a si' tiah ningani zing ah a tial.
Comey nih a hawipa hmang in Trump he an i tonnak biathli (memos -classified informaation) a chuahtermi kongah an mawhchiat len ve. Trump sihni Marc Kaswitz nih cun 'tazacuai khawh a si. Atu zong kan zoh cuahmah lio a si' tiah a chim.
Comey nih cun 'Russian he an i pehtlaihnak ka hlat hna ruangah a ka phuahmi a si' tiah fiang tein a chim. A chim thanmi cu 'Trump nih ngol ding in aa ka fial i ka duh lo caah a ka phuahmi a si. A ka phuah lo cun kan hlathlaimi a ngol ding a si ti lo. Cucaah ngolter duh ah a ka phuahmi a si' a ti.
Trump cozah mawhchiat an ton khunnak ruang cu phunghram nih sualnak kawltu ding ah rian a khinhmi FBI lam a kham tiah an soisel. Mipi an siah President a siah sualnak le palhnak an tuah tikah FBI nih hlathlai hna ding in rian an ngei.
Trump cozah sualnak an kawl cuahmah lioah a rianphuah a si tikah fak khun in Congress zong nih hma an laknak ruang a si. President a siah aho an siah upadi tangah an um timi cu hi bantuk zawn ah hin a si. FBI nih hlathlai lengmang an si. An sualnak an hmuh hna ahcun an sual ning tein biaceih an si.
James Comey nih a phuanmi pinah a hmaban a pehzulhtu Robert Mueller nih a phuan than te lai i Trump campaign tuahtu le Russian pehtlaihnak an ngeih i US thimnak lam an pialter taktak ko ahcun Congress nih Russia zong dan a tat than te lai. Asinain atu an hlat cuahmahmi nih a chuah pimi phi cungah aa hngat te lai. Ref: CNN News.