Ningani ah US ralkap inn pi Pentgon nih Russian biachimmi fianternak an vun tuah. Tuan deuh ah khan Russian Defence Ministry nih a chimmi cu 'Raqqa ah ISIS meeting tuah lio kan kahnak ah ISIS hruaitu Abu Bakr al-Baghdadi a thi kho men' tiah an chim.
Asinain US nih cun 'Russian biachimmi a hmaan le hmaan lo fehternak caah tehte kan ngei lo tiah Navy Captain Jeff Davis nih Reuters ah a chim. ISIS hruaitu Abu Bakr al-Baghdadi hi a thi taktak maw timi Russia nih cun an hlat cuahmah lio a si.
Russian Foreign Minister Sergey Lavrov nih a chimmi cu 'ISIS hruaitu a thih taktak le thih taktak lo biafiang kan theih rih lo. Keimah nih cun ka fehter ngam rih lo' tiah a chim. May 28 ah khan ISIS meeting tuah inn pi an rak kah.
Meeting chungah aa telmi ah hin ISIS hruaitu Abu Bakr al-Baghdadi le hruaitu upa 30 le ralkap 300 hrawng an si. Raqqa in hmun dang ah zamnak kong an ceih tiah Russian Defence Ministry nih a chim. Russian nih drone an thlah i an hlatter.
Mah hnuah Russia nih a raltuknak vanlawng Su-34 le Su-35 a thlah hna i ISIS meeting tuahnak inn pi cu an va phomh. ISIS an thi len hna tiah Syrian activist nih a chim. Fiang tein a thimi an theihmi chungah ISIS hruaitu Abu al-Khadji al-Mysri, Ibrahim al-Naef al-Khadj le Suleiman al-Shauah an i tel. Ref: TOI.