Lettu
Luther Tin Hre
Chungum
Biahmathi 7
Ahodah Vainaam A Dawk Kho Lai? 9
Saram Hraang A Kawlnak 14
Ekkalibar Vainaam 18
Sir Balin Tuanbia 20
Cabuai Pum Aa Thokning 26
Mecisian Merlin A Thi 29
Morgan Le Nih Siangpahrang Thah A Duh 30
Biomin Nih Siangpahrang A Halmi 35
Bel Thiang An Kawlnak 57
St. Augustine Biakinn Ah Siangphrang A Tlawng 58
Bel Thiang An Hmuh 61
Galahad Ralyhatnak 63
Lancelot Khuaruahhar Thil Hmuhnak 66
Pafa An I Ton Donghnak 68
Bel Thiang Hmuhnak In Galahad A Thi 70
Siangpahrang Nu Caah Ahodah A Dir Ngam Lai? 74
Astolat Ah Ngaknu Dawh Pakhat 86
Kuinevar Duhmi A Rak I Dang Ziar 103
Hnahchuahnak An Ngeih 112
A Donghnak Raldohnak 126
Pathian Sin An Sualngaihchihnak 132
Biahmaithi
Siangpahrang Arthur tuanbia hi chan dai loin Britain ah minthang ngaimi le an rel bikmi pakhat a si. A.D 830 ah Nennius nih a rak tial i, zeiruangah dah chandai loin a lar tuk timi le Arthur tuanbia hi a hmaan taktak maw timi hi fiang tein an thei lo. Nihin ah cun Siangpahrang Arthur kong hi hmun dangdang le caan dangdang in a tialmi hi an tampi cang. Catialtu kip nih an chim ciomi cu Arthur hi kumzabu panga i British ralbawi a si i, Anglo-Saxon (mirang siangpahrang hna) a rak doh i, Nitlak lei ram rualrem le daihnak in a rak hruaitu a si an ti.
Kumzabu hleikhat ah British ramchung i, Monmouth khuami Geoffery nih Siangpahrang Arthur kong cu tling deuh in a tial than – a chuahnak khua Tintagel in a thihnak tiang – hi cauk nih mirang ram vialte cu a hninh dih than. Nihin tiangah Siangpahrang Arthur kong an tialmi cauk hlun hi zahnih leng a um ti a si. Mirang ramchung kip ah a lar tuk tikah England Siangpahrang Henry VIII nih Siangpahrnag Arthur Naih (Knight) hna an thutnak Cabua Pum (Round Table) cu a thar in hmanthlak a serter than hna i, Arthur thutnak zawn ah amah aa thutter i, ‘Khrihfami hna emperor le British Empire hruaitu’ tiin ca a tialter hna ti a si.
Siangpahrang Arthur kong hi a dai kho bal rih lo; University kip le sianginn kip le miphun kip nih an rel i, film zong in an i zeih lengmangmi tuanbia dawh le tuanbia laar a si. Kum a zaza in a luan cang i, tuanbia dangdang le minthang minung an chuak chin lengmang cang ko hna nain Siangpahrang Arthur tuanbia nih minung suaisawng khawhnak dat a ngeihmi zor hlei a tim lo. Chanciam lo tuanbia tha a si.
Zeiruang ah dah Arthur tuanbia hi a laar tuk timi an zoh lengmang tikah hruaitu tha siangpahrang pakhat a sinak te hna, chanthar technology a chuah hlan i, hlan lio ram khat le ram khat an rak i tukning te hna, a Knight (Naih) an ralthatnak le ram hmunza cul in an sunhsakhannak te hna, Lancelot nih raltha ngai le zumh awktlak ngai in a bawinu Kuinevar harnak chungin atu le atu in a khamhnak te hna le a thli in an karlak duhdawtnak an ngeihning te hna, ngaknu-tlangval karlak ah duhdawhnak a umning te hna, Bel Thiang an kawlning te hna, cun a dongh lei, Siangpahrang Arthur a thih hnu i, Siangpahrang nu Kuinevar a siah Lancelot a siah vawleicung pumsaduhnak le nuamhnak vialte kal tak in sualngaihchih in thlacam le rawlulh in caan an hmanning le Pathian sinah pumpeknak an ngeihning te hna hi rel than hna tikah minung lungthin le ruahnak dai tein um thiam awk an rak tha lo; an rak tial hmasa lio naak hmanh in a tu ah hin hlah maw an duh deuh ti tluk in a laar.