Nizan tihni ah khan Syrian raltuknak vanlawng nih US hawi a simi Syrian Democratic Force cu bom an thlak hna. US nih a rannak in an zuan hnawh colh i puak lak in an va phomh. Russia thin a hung tuk. US zong a rannak in ralrinnak a rak pek colh hna.
'US nih atu voikhat a kah than ahcun kan lehrul cang lai tiah Russia parliament i deputy head defence committee Frants Klintsevich a chim. Syria ramchung ah Syrian an kahmi cu kan cohlang kho ti lai lo tiah a chim chih.
Russia Deputy Foreign Minister Sergei Ryabkov nih cun 'US nih Syrian raltuknak vanlawng a kahmi cu mi ram va lak timh bantuk a si' a ti.
Nikhatni ah US Inn Raang nih an vun leh than hna. Inn Raang biachimtu Sean Spicer nih a chimmi cu 'kan caah ral a si i, kan himnak caah tihnung a simi poah ahcun kan i runveng lai i, a herh ning in rian kan tuan lengmang ko lai' a ti.
A chim thanmi cu 'Syrian cozah nih an theih awk cu kan ralkap le kan hawi an tongh dingmi hi kan duh lo. ISIS kan doh chungah kan himnak caah dawnkhaantu an si lonak dingah Syrian cozah zong nih cawlcangh a thiam a hau. Kan caah ral a simi cu kan zoh sawhsawh hna lai lo' a ti. Ref: VOA News.