Republican upa pakhat zong a si i an bochan ngaimi Senator John McCain nih thinhung ngaiin bia a chim cang. President zong aa cuh balmi Senator Marco Rubio zong a um kho ti lo. North Korea nih Otto an tlaih i an thahnak kongah a thinhung tuk.
Marco nih a chimmi cu 'zeihmanh a si lomi banner lak ruangah thongthlak ding hrimhrim zong a si lo. Mah banner lak ruangah hrimhrim ah an thah ding zong a si lo' tiah fak ngaiin a chim.
President Trump nih cun 'chungkhar hnemhnak bia zong a chim i North Korea sualphawtnak bia zong fak ngaiin a chim. 'North Korea cozah hrannak kan cohlang kho lo' a ti cang.
Secretary of State Rex Tillerson nih cun 'North Korea nih Otto Warmbier thong an thlakmi le an thahmi kongah tuanvo kan lakter hrimhrim hna lai. Minung pathum a tangmi zong kan luatterpiak hna seh' a ti.
John McCain nih cun fak ngaiin a chim. 'North Korea cozah nih American minung a kan thahpiak. US a kan huatu ram nih kan minung thah hi kan cohlang lai lo; kan cohlang kho fawn lai lo. US nih lehrul kan cham hrimhrim lai' a ti.
North Korea nih cun an rak hran hnawh chin lengmang hna. 'A sual tluk tein a tuarmi a si. Banner a firmi hi kan hruaitu Kim Jong-un hmaiah bengh tluk a si' an ti. Ref: The Daily Mail.