President Trump nih a biapi tukmi minthutnak pahnih a ngei lai. Pakhatnak cu vampang sak ding in min a thut lai i, pakhat cu zei bantuk Muslim ram refugee dah kan ram chungah kan luhter hna lai timi minthutnak a ngei lai. Tam deuh nih an zumhmi cu a tanglei ram hi a kham hna lai tiah an zumh.
Twitter ah a tialmi cu 'thaizing cu National Security caah timhnak kan ngeihmi ni ngan pakhat a si i, timhmi tampi lakah vampang kan dirh lai' a ti. Tapung le misual tamnak ram Iran, Libya, Somalia, Sudan, Syria le Yemen leiin a ra dingmi refugee a kham hna lai i, visa a ngei cia hmanh a kham hna lai tiah zumh a si.
Syria hi kumruk chung ramchung buainak a um hnuah ISIS, Al-Qaeda le Al Nusra Front cawlcanghnak hmun a si. Iraq hi 2003 hnu cun a fekfuan kho ti lo. ISIS an siah Al-Qaeda an siah Taliban an siah an cawlcanghnak hmun a si. Iran hi tapung a bawm pengmi an si tiah US State Department nih list ah aa tial cangmi ram an si.
Libya hi naite in tapung an karh tuknak ram a si. Tapung bu 6/7 hrawng an um lai tiah an zumh. Somalia hi 1991 in cozah a fekfuan kho ti lomi an si. Al-Shabbab tapung hmunkhurnak a si. Sudan hi Palestinian tapung a bawm lengmang tu an si i, Britist in Syria ah tapung an zuannak lam tan a si. Yemen hi zungzal in Al-Qaeda dornak hmun a si.
2014 in ramchung buainak a um hnu in cun ISIS nih an hmunkhurnak ah an hman cang. Muslim laknak kongah nilini ah min a thut lai tiah zumh a si. Campaing a tuah lioah cun Muslim ram in US ah a rak rami paoh cu kan kham dih hna lai' a ti ko nain atu cun a ruahnak a thlen deuh lai tiah zumh a si. Khrihfami hna cu a ruahpiak ko hna lai tiah an zumh fawn. Ref: The sun.