Aa Thleng Cuahmahmi Chan I Theology Dirhmun
“Pathian nih Khrihfabu a zohkhenhning hi khuaruahhar a si. Israel tuanbia le Khrihfabu tuanbia hi aa lawhnak zawn tete tampi a um. Egypt in an rak chuah ah hin raltuknak tampi an tong i, an zumhnak in an pial caan tampi kan hmuh. Pathian nih prophet a auh hna i, lam tampi le phun dangdang in an cawnpiak hna i, Amah sinah an kirpi than lengmang hna. Khrihfabu zong a si ve. Khrihfabu a chuah ah hin ral tampi a tong. Asinain Israel bantukin ral cu a doh lo nain hremnak cu a tong tuk ve hringhran. Zumhnak ah an tluk caan zong tampi kan hmuh i, Pathian nih Israel chan ah prophet hna a rak hman hna bantukin Augustine, Martin Luther le a dangdang hna a hman hna i, Khrihfabu a thawhter than ve lengmang. Cucaah a caan le a hmun nih a herhning in Pathian nih riantuantu a auh hna i, a fialmi hna i, tlamtlingte in a rian an limpiak lengmangmi hmuh khawh a si.”[1]
“Pathian nih Khrihfabu a zohkhenhning hi khuaruahhar a si. Israel tuanbia le Khrihfabu tuanbia hi aa lawhnak zawn tete tampi a um. Egypt in an rak chuah ah hin raltuknak tampi an tong i, an zumhnak in an pial caan tampi kan hmuh. Pathian nih prophet a auh hna i, lam tampi le phun dangdang in an cawnpiak hna i, Amah sinah an kirpi than lengmang hna. Khrihfabu zong a si ve. Khrihfabu a chuah ah hin ral tampi a tong. Asinain Israel bantukin ral cu a doh lo nain hremnak cu a tong tuk ve hringhran. Zumhnak ah an tluk caan zong tampi kan hmuh i, Pathian nih Israel chan ah prophet hna a rak hman hna bantukin Augustine, Martin Luther le a dangdang hna a hman hna i, Khrihfabu a thawhter than ve lengmang. Cucaah a caan le a hmun nih a herhning in Pathian nih riantuantu a auh hna i, a fialmi hna i, tlamtlingte in a rian an limpiak lengmangmi hmuh khawh a si.”[1]
Kum zabu hleiruk zong hi Pathian nih namneh hmangmi Khrihfabu pi a vun sersiam than. Pathian nih a Khrihfabu hi a zoh sawhsawh lo i, zohkhenhtu ngei lo bantukin a umter lo timi hi tuanbia caan thluan zoh tikah hmuh khawh a si. Thil pakhat khat a tlung dingmi a um lai poah ahcun Pathian nih a mipi sinah theihternak a tuah hmasa lengmang hna. Theiternak a tuahmi cu timhtuahnak ngei cia seh tiah ralrinnak a peknak a si. Israel cungah thil a tlung dingmi a um tikah Pathian nih a prophet hna hmang in theihternak a tuah hmasa hna. Tahchunnak ah, Babylon uknak tangah sal nan si lai tiah Pathian nih ralrinnak a pek hna. Asinain Israel nih aa tim lo. A kal taktak. Khrihfabu zong Pathian nih thanghnak a tuah lengmang ve. Pathian thanghnak le caknak a thei lomi Khrihfabu cu a tlau ve (Biathlam 3). Kum zabu hleiruk i, Biaknak Sersiamnak zong hi zoh tikah Khrihfabu lam thluan a hmaan ti lo caah Pathian ralrin peknak a si lai tiah ruah khawh a si. Martin Luther le John Calvin le a dangdang nih Pathian aw an theih i, an theih bantukin Pathian rian an tuan i, Biaknak Sersiamnak an tuah.
Kum zabu hleiruk ah Biaknak Sersiamnak a chuahmi hi Khrihfabu lawng sersiam loin a ra cuahmahmi chan thar tiluan thalo a ton dingmi timhnak a ngeihtermi a si ti khawh zong a si. Kum zabu hleiruk ah hin Pathian nih a Khrihfabu cu: 1) “Bible Lawnglawng” timi zumhnak ah a kir pi than hna; 2) “Zumhnak lawnglawng in khamhnak hmuh khawh a si” timi zumhnak ah a kir pi than hna. Kum zabu hleiruk ah hin Biaknak Sersiamnak um loin Medieval Age chan kal pimi Khrihfabu kha si seh law a ra laimi chan thar tiluan thalo nih Khrihfabu hi a fenh men ko hnga. A tanglei ah kan vun zoh laimi ah hin Khrihfabu sersiam lo le timhnak ngei loin rak um seh law zeitluk in dah a ton dingmi nih hin harnak a pek lai timi theih khawh a si.
Chan Thar (Modern or Enlightenment)
Atu kan chan hi chan thar (modern) a si ti lo. Postmodern chan a si cang, a sullam cu modern chan a dih hnu chan dang ah kan um cang. Modern le postmodern chan hi aa khat maw kan ti ahcun aa khat lo. Chan kip cio nih zumhning, zatlang nunning le zulhmi phunglam dangdang an ngei cio. Chan thar a chuahnak ruahnak dangdang, hmuhning dang le thil thar dangdang a um ruangah a si. Chan hi minung nih maw a thlen, caan nih dah a thleng? Minung nih kan thlen.
Fiangternak
“Chan thar (modern) chan hi kum zabu hleisarih dongh leiin aa thok i, kum zabu hleiriat in hleikua chung tiang influence a tuah”[2] tiah Geisler nih cun a ti. Asinain McGrath nih cun kum zabu hleiriatnak aa thok lai hrawng in a si tiah a ti. ‘Chan thar’ kan ti tikah zeidah a sullam a si? Chan khat a chuah paoh ah chan thar lengmang a si fawn tikah ‘chan thar’ kan ti duhnak sullam hi zeidah a si hnga? “Chan thar’ nih a chim duhmi cu Nitlak lei ram khuacuanhning a si i, kum zabu hleiriat aa thok hrawnghrang i, minung nih a thil ti khawhnak cungah zumhngamnak ngeih hram aa thoknak chan kha a si”[3] tiah McGrath nih cun a ti. Science lei fimnak thar an hmuh hnu in chan hi a thlen i, minung hi sang tuk ah cawisan a vun si.
Chan Thar Khuacuanhning
Kum zabu hleiriat a chuah hrawnghrang ah hin chan thlen aa thok. Hi chan hi chan hlun in chan thar aa thlen a si. Historian le theologian nih cun kum zabu hleiriat in cun Khrihfami nih Pathian kan hmuhning, kanmah le kanmah kan i hmuhning, vawlei pi kan hmuhning aa thleng dih cikcek cang an ti. “Kum zabu hleiruk nih chan thar hi a paw i, kum zabu hleiriat ah a hrin”[4] tiah an ti. Chan thar hnu cun Khrihmi zumhnak tlaihtleng hi cohlan an duh ti lo. Khrihfami zumhnak an zoh lengmang tikah minung khuaruahning he aa kalh an timi paoh cun sullam ngei lo an si tiah an ruah dih cang. ‘Thum Komh Pathian, Jesuh Khrih nih a thisen in a kan tlanhnak’ etc ti bantuk hna hi sullam ngei lo an si, zeicatiah minung ruahnak in tuak awk a tha lomi an si an ti cang. Khrihfami zumhnak fak piin dohnak a um tikah chan thar hnu cun Khrihfami zumhnak hi a zungzal in a hmun kho ti lai lo tiah an hmuh.
Chan thar tiluan thazaang a thawn tuk tikah Khrihfami nih do hawk a tha ti lo. Cun Khrihfami nih chan thar tiluan kan hrial lai ti hmanh hna seh law theology hi amah lawng umter ding cun sullam ngei lo menmen ah a cang ding a si. Cuticun chan thar tiluan chungah Khrihfami zumhnak cu luh pi i, chan thar tiluan duhning in theology cu sersiam le umter a si. Chan thar a vun chuah in cun theology hi biatak tein aa sualsan. Chan thar nih cun Pathian kha biapi chia ti loin minung kha biapi ah a chiah cang. Medieval chan ah cun minung khuaruahnak le Bible fonh in biatak an kawl. Tahchunnak ah, Medieval chan ah Anselm nih cun, “ka theih khawhnak hnga ka zumh” a ti. Khrihfami zumhnak le minung khuaruah khawhnak kha fonh in biatak kha an kawl, asinain chan thar hnu cun zumhnak tlaihtleng kha thlen in ‘ka theih khawhmi ka zumh’ ti a si. A sullam cu ka theih khawh lomi le ka fian khawh lomi cu ka zum lo ti a si. Immanuel Kant nih a tanglei bantukin fiang tein a chimmi hi ruah phu ngai a si:
Immanuel Kant nih cun “Chan thar cu zohkhenhnak (tutelage) chungin minung a luat/chuah chan a si. Zohkhenhtu (tutelage) nih minung a tlaih chung paoh cu minung nih a thil ti khawhnak a hmang kho lai lo. Tutelage hi kan ral a kan chiattertu a si i, minung nih a khuaruah khawhnak hi raltha tein an hman a herh – raltha tein khuaruah khawhnak na ngeihmi kha hmang ko – hihi chan thar tlaihtleng cu a si”[5] a ti. Minung kan tuanbia tiluan a zoh tikah minung hi chuk leiah zuan loin cho lei ah a kai ko tiah a hmuh.
Tahchunnak in fianternak hitihin a tuah, “hngakchia cu tuah kan timi hna paoh an tuah dih lai zeicatiah kan u le cu a thei deuhmi an si caah a kan fialmi hi a hman lai i, a nawl kan ngaih hna a hau ti lungput an ngei. Kan society zong hi hngakchia bantuk an si. Khrihfabu le State nih a chimmi paoh hngakchia bang an zulh dih i, an tuah dih. Society nih hitihin Khrihfabu le State a zulh lengmang ko ahcun nutling le patling a phan kho lai lo. Cucaah amah tein a ruah a herh cang, amah tein a thancho a herh cang, anmah tein lamhmai a sat a herh cang”[6] tiah Kant nih cun a ti. Kant nih a chimmi hi, influence nih a tuah tuk cangmi minung le society lungput a fianter hringhran. Medieval chan hlan in a hnu chan tiangah mipi cu zuk/lem bantukin Khrihfabu le State nih a thing hna. Mipi nih zeidah a zumh lai I, zeidah a zulh awk a si timi kha serpiak an si taktak. Khrihfabu le State kha a palh kho lo le a hmaan bik ah ruah an si tikah mipi cu duh paoh in thui le hlen an si. Hi bantuk lungput in society nih kan luat a hau cang. Minung kip nih a chia le tha thleidannak kan ngeihmi hi hmang hna u sih law kanmah cio in nun hram kan thok awk a si cang tiah ‘tutelage’ a chim duhmi kha a si. Kant nih a chim thanmi cu ‘philosopher rian cu vawleicung thil umtuning theih lawng si loin thlen zong hi a si, cucaah fim hi i cuh cio hna u sih”[7] a ti.
-------------------------------------------------------
References:
[1] Luther Tin Hre, Augustine: A Tuanbia Le Theology Hngalhternak, pp 66- 7.
[2] Norman L. Geisler, Baker Encyclopedia of Christian Apologetic, p. 213.
[3] Alister E. McGrath, Christian Theology: Introduction, p. 67.
[4] Stanley J. Grenz & Roger E. Olson, 20th Century Theology: God & the World in a Transitional Age, p. 15.
[5] Colin Brown, Christianity & Western Thought: A History of Philosophers, Ideas, & Movements, pp. 285-6.
[6] Bid, p. 286.
[7] Bid, p. 287.