President thimnak result a vun chuah ah khan vawleicung hruaitu hna nih Donald Trump cu phone in an conglawmhna cio; cheukhat nih cun cakuat in an conglawmh.
Cu chungah Trump nih Israel PM Netanyahu lawng hi 'a pakhatnak kan ton dingmi na si lai' a rak ti.
Asinain Japan Prime Minister Shinco Abe le President Donald Trump cu nilini ah tonnak a ngei lai. New York ah an i tong lai i, a hmun le a caan a fiang rih lo. Japan PM Abe hi President thimmi Trump a tong hmasa a si lai. Trump nih teinak a hmuh ah khan phone a chawnmi ah aa telmi a si ve.
Japan lei upa pakhat nih a chimmi cu Japan-US pehtlaihnak kongah aa tong ding an si. Asia-Pacific region ah daihnak le fehfuannak a um khawhnak ding ah a biapi tukmi cu Japan-US pehtlaihnak hi a si tiah a chim.
Campaign a tuah lioah khan Trump nih a chimmi cu 'US lawng nih tangka kan dihmi cu a hmaan lo; aa tluk cio tein tangka an liam hna ding a si' a rak ti. Japan ah US ralkap a ummi hna zong hi Japan nih a kan bawmh ve ding a si tiah Trump nih a rak chim.
Peru i Lima ah Asia-Pacific Summit a ngei ding an si caah Trump ton pah in US ah a um lio a si. Ref: Voanews.