Lam tlum loin a thongthong in Donald Trump president si a duh lomi hna cu sandah an piah cuahmah hna. US Inn Raang pi pawngah an i pum hna i, an duh lonak an langhter. Trump president tlinnak nih an hnabei a donghter ngai hna.
Boston in Los Angeles tiang a thongthong in an i pum hna i kan president caah Trump cu a si kho lo an ti. Police nih an tuak ning ah cun New York zong ah minung 5000 tluk nih sandah an piak an ti.
Trump Tower pawng i sandahpiahtu nih an au pi bikmi cu campaign a tuah lioah a chimmi hna pawl kh an si. Nick Powers nih a chimmi cu Trump ka tihnak cu 'dirter i dah' timi policy a hman laimi hi a si. Cu bantuk nih mi tam tuk thong a kan thlakter lai' tiah a chim.
Sandah an piahnak khua hna cu Atlanta, Austin, Texas, Boston; Chicago; Denver; Philadelphia; Portland, Oregon; San Francisco, Seattle le Washington tbk hna an si. Democratic tanh states pawl an si. College student pakhat nih a chimmi cu 'mipi covo caah sandah ka piahmi cu ka zum kho rih lo' a ti.
Minung pakhat nih a peh thanmi cu 'lungrawk ngai a si ko zeicatiah hi tiang hi democracy kan phan cang i, hnulei ah kan democracy a kir pi thanmi hna kan lo' tiah a chim. Portland ah cun 'No Trump, no kkk, no fascist USA' an ti. Trump nih hin pumpak nawlngeihnak hmang in a duh ning paoh mipi zalonnak le luatnak kham in a kan uk lai i kan mongh lai ti an phang.