Iraq khua Mosul ral kan dohnak hi ISIS donghnak hramthoknak a si cang tiah U.N upa pakhat nih nithumni ah Security Council ah a chim. Iraq security ralkap an siah Peshmerge an siah kan hawile dangdang an siah ISIS kut in Mosul luatternak caan a nai chin lengmang cang tiah a chim.
Kan raldohnak mipi hliamhma tuarter lo ding kha a biapi tuk ah an chiah fawn. A chim thanmi cu ISIS nih minung a thongthong in an lak hna i, Mosul khua ah an chiah hna i an pum runvennak caah an hman tiah a ti. Naite ah khan thlan tampi an hmuh i an lutanmi ruak a 100 leng an hmuh than.
ISIS sualnak le chiathrutnak nih vawleicung hruaitu hna thin a hunter chin lengmang. Iraq cozah le ramchung mipi karlak ah theihthiam lonak a um ngai fawn. An karlak ah theihthiam umter hi an i zuam. ISIS an tei hnuah hmun khat te ah rian an tuan ti zong a herh.
Mosul khuami 35, 000 hrawng hi ISIS tih ah hmun dang ah an zam i, 20,000 hrawng hi camp ah an um. Khuasik a vun phanh chin lengmang tikah timhtuahpiak ngai an hau rih lai tiah UN upa nih a chim.