Floyd Mayweather 40, cu UK ah a tlawn lio a si. Boxing thongh thiam Liam Walsh he IBF titile an i cuh te lai. Atu hi aa timh cuahmah lio a si. Atu lio ah an uar ngaimi Anthony Joshua kong an hal i bia a lehmi hna nih mipi thin a hunter ngai.
Boxing thongh thiam siangpahrang Anthony Joshua nih zahan thla ah khan Ukraine pa Wladimir Klitschko a tei. Voi 19 aa thongh chungah voihleikua in knockout in a phomh dih hna. Vawleicung ah a lar chin lengmangmi Joshua kong zeitin dah na hmuh ning tiah an hal.
Floyd Mayweather nih aa thawh i 'a thiammi an tam pi' tiah a leh hna. 'Na hlawhtlin lio caan bantukin Joshua nih hlawhtlinnak a hmu ve te lai maw?' tiah an hal. A leh thanmi hna cu 'mino tampi an um; a ti kho lawng an si hna. An thisen aa pe i, a thlen a chuak i a mitthli a tlami mino thangthar tampi an um ko hna' tiah a leh.
'Ni fatin an i zuam peng. Gervonta Davis, Badou Jack nan theih hna. A dangdang zong an um len rih hna' tiah IBF, WBA le IBO champion a hmu cangmi Joshua kong a chim duh bak lo. An hal chih zong ah a hrial lengmang. Midang kong tu a chim lengmang.
Minung pakhat nih cun 'Gervonta Davis le Badou Jack te hna Joshua level in chiah hna cu tiah a zai hnawh len. Minung pakhat nih a tial thanmi cu 'Floyd Mayweather hi a hmaan ti lo. Sport tuanbia ah a man sang bik na si. An in tei kho rih lo. Asinain midang upat na duh lo. Hnawhchuahnak na ngeihmi a sang tuk' a ti.
Tu kum dongh leiah Conor McGregor he an i thong lai. Min an thut cang. Ref" The Express.