Alanah hi aa dawh tuk ko nain ka muichia tuk tiah a ruah lengmang. Body Dysmorphic Disorder (BDD) timi zawtnak a rak ngei. Hi bantuk zawtnak cu kan muisam aa dawh lo ti tbk in a ruat i sivang i a ummi pawl an si. Expert nih an ruah ning ah cun minung 50 chungah 1 tbk hi BDD zawtnak an ngei ti a si. Asinain mi tam deuh nih cun a um le um lo zong kan thei lo.
"Midang caah hi bantuk ka hmai hmuh ding cu a si kho lo. Ningzak a si tiin ka ruah tawn' tiah kum 20 nu Alanah nih a chim. Ka hmai khat in hmadeh tete an khat. Ka nu nih cun pakhat hmanh ka hmu hna lo a ka ti. Ka vunhnhawng hi an tha lo tuk. Ka hnar zong a ngan tuk i a kawi i a sau tuk. Ka mit le an fa tuk' tiah aa ceih lengmang.
Alanah hi aa dawh ngaimi ngaknu ni te a si. Thlalang aa zoh fatin ah hin midang hawi nih an hmuhpiak lomi aa hmuh lengmang. BDD zawtnak a ngei i, a BDD zawtnak a zual deuh paoh ah thlalang atu le atu in aa bih. Suimilam pali chung hna hi aa tamh-muai. Cu hnu tiang hmanh ah leng chuah lai a tih tuk.
A vunhngawng hi a dawh a zam hna i, an sawn dih tiang le an fak dih tiang hna a dawh hna. A hngakchiat lioah cun samkir te a rak si i, hmanthlak hi a rak duh ngai, asinain kum 14 a vun si tikah a sining aa thleng. A ruang a thei kho lo. Ka hnulei ka zoh than tikah ka theihmimi cu BDD sympton an rak si. Kan sianginn ah thlalangawng nganpi a um. Ka muisam zeidah a lawh tiah kaa zoh lengmang.
Bathroom ah ka kal than i thlalang ah kaa zoh than tawn. Kum 15 ka si in cun sianginn ka kal ti lo a ti. A nu Scarlett nih a thlah tawn, asinain Alanah hi cazoh a duh ngaimi a si nain siang inn an phak cun motor chungin chuah a duh ti lo. Inn ah a tin pi than i, a hneksak hnuah a vun rat pi than, asinain a chuak duh thiamthiam lo. Voi riat tiang hna ka tuah pi tiah a nu nih a chim. Cuticun hawi he aa then chin lengmang. A ziaza aa thlen tukmi nih an lungre a theihter tuk fawn.
Kum hnih- kum thum chung cu zeidah a si timi kan thei lo. Keimah nih ka kholh, ka din-eiter i ni fatin ihnak lawng te a um tiah a nu nih a chim. Ka lung hi a fak tuk zeicatiah nule kip nih cun kan fale hi an i dawh tuk ah kan ruah hna, asinain Alanah ah zeihmanh a dawh lonak le a chambaunak a um lo. Ahopoah nih kan hmuh dihmi a si ko tiah a peh.
Ka muichia tuk a ti lengmang tikah a nu zong a sivang. Atu cun ka muichia tuk a ti zong ah ka holh ti lai lo. Zeihmanh ah ka ruahpiak ti lai lo. Ka chuah tak lai i thil dangdang tu ka ruat cang lai a ti. Nule kan si tikah kan fale runven ding hrimhrim kan si i kan bawmh hna ding a si. Asinain zeihmanh ka tuahpiak khawh ti lo tikah a ti-ngeihnak ka thei ti lo.
BDD an cheknak ah hin sau ngai an rau. Voitam nawn cu an chek palh rih. A hnuah London i Maudsley Clinic ah a zawtnak an theih khawh. Thla nga chung a um hnuah duhsah tein a dam. Hanthlak a duh lomi kha atu cun hmaan aa thla i BDD kan theih khawh cio nak lai tiah mipi sin kip ah phuan le thanh aa zuam cang.
BDD kan ngeih le ngeih kong hi theih a har tuk, asinain a ngeimi hna caah cun an muisam langh ning kha an i zahpi i mipi hmai bia chim zong an ngamh lo a ti. Ka harsat biknak cu kan hnar hi a si, asinain kan si ning ka cohlan khawh hi kum thum hnu lawng ah a si a ti. Ni khat cu selfies 200 ka rak i laa ka delect than dih hna tiah a chim.
Willson nih a chim ning ahcun BDD hi thleirawl in aa thawk thawn i midang nih nisawh le soisel le tuaitam ruangah a chuak tawnmi a si. Cu nih cun a feeling kha a danter. Lungthin dernak a chuahter, thinphannak a chuahter i ningzahnak zong a chuahter; a donghnak ahcun midang sin tiangah chuah-langh ngam lo tiang in a zual khomi a si a ti.