Kan hnulei campaign ah khan President thimmi Donald Trump nih a Khrihfabu min a chim i, President kan tlin i, Inn Raang pi ah ka phanh ahcun Khrihfami hna aiawhtu thawngbik ka si lai a rak ti.
Donald Trump nih a chimmi cu 'keimah cu Protestant ka si. Presbyterian Khrihfabu ka si. Ka uar tuk' tiah CBNs David Brody sinah a chim. 'Ka zum ko u, president ka tlin ahcun Khrihfami hna aiawhtu thawngbik ka si lai' a ti.
US tuanbia ah President hi Khrihfami zumtu tha an rak tam. Biaknak an upat i, Pathian tihzahnak in ram an rak hruai. Asinain chan a vun kal deuh tikah Pathian thei lo nih ram an hruai tikah Khrihfami caah harnak a tam chin lengmang. Asinain Trump nih a kamhmi hna cu 'nan aiawhtu thawngbik kan si lai' a ti hna.
Atu cu teinak a hmuh cang i, Khrihfami hna nih an zoh cio. Biakinn ah punghmaan in a phan kho lai maw phan kho lo timi an zoh ngaingai cang. Presbyterian Khrihfabu pastor nih 'Trump caah kan biakinn kan on' an ti cio.
Capitol Hill Presbyterian i Rev. Scott Wilson nih a chimmi cu kan tuu si ding in ka Khrifabu nih an cohlan ve ko lai a ti. 'Kan sinah pumh a duh i Pathian thangthat le Jesuh Khrih thawngtha ngaih a duhmi kip caah kan biakinn kan on ko. Kan nih cu pakhat le pakhat i zohkhanh le a rawk cangmi vawlei bawmchaan ding in timh cia kan si' tiah a chim.
Democrat Jimmy Carter cu President a rak tuan chung vialte ah DC i First Baptist Church ah fel tein aa pum i, Sunday School a cawnpiaktu a rak si tiah Times Magazine nih a chim. President in aa dinh hnu tiang ah Georgia i Plains Khrihfabu Maranatha Baptish Chruch ah Sunday School a chim rih hna a ti.
President Bill Clinton le a chungkhar zong hi President a tuan chung vialte Foundy United Methodist Church ah aa pummi an si. President George W. Bush le a chungkhar hi Capitol Hill i African-American Lincoln Park United Methodist Church aa pum hmasami an si i, US Inn Sang pi an teih hnu in cun an ralkap hna sinah David Camp ah an i pum; a caan ah Texas, Crawford i a Khrihfabu thing ah an i pum.
President Obama le a chungkhar hi a caan ahcun Inn Raang pi in lam ralchan ah a ummi St. John Episcipal Church ah an i pum tawn, asinain David Camp ah an i pum tawn ve. Washington ah an um ahcun zarhpini ah inn ah an um tiah Time Magazine nih 2011 ah a chim. President Ronald Reagan hi St. John Episcopal Church aa pummi a si ve.
Trump zong hi a umtu le a biachim ahcun a hringhro chiami a lo ngai nain a zumhnak a fek ko tiah a neihniam Evangelical Khrihfami hna nih an chim. 'Jesuh Khrih hi ka sualnak in a ka khamhtu a si tiah a cohlan ko' tiah New Destiny Christian Center Pastor Paula White nih a chim.
A chim thanmi cu 'Trump nih a tuahmi kip ah lenglanghter a duh lo. Minthatnak a kawlmi a si lo. Mi tha le mi ngunsiang ngai a si. Trump hi thei taktak cio hna seh ti hi ka duh ngai. A fale zong nih an thangthat ngai' tiah a chim chih. Ref: Christian Post.