Kum 12 tluk a no rihmi nu hna tiang he sex ka tuah tiah a phuan hnuah Eric Aniva cu July ah tlaih ding in President nih nawl a chuah i, an tlaih. Nu na thurhnomh hna tiah Malawi President Peter Mutharika nih a tlaihtermi hna a si.
Aric Aniva nih a chimmi cu ka sual pimi nu chungkhar nih a kan fial caah ka tuahmi a si. An hngakchiatnak kha hlo cang hna seh law, nu tling si cang hna seh tiah an chungkhar nih duhsaknak he sual pi hna ding in an ka fial caah ka tuahmi a si a ti.
President Peter nih tlaih ding in nawl a chuah i an tlaih lio zong ah hin ahohmanh Aric ralchanh in an rak chuak hna lo. Asinain Malawi Gender Equality Act timi phung in a kong an ceih i, a pasal nih a thih tak kaami nuhmei na sual pi an ti.
Hi sual an phawt tu ah hin nu pahnih hmaiah an rak chuak i a sualnak tehte an langhter. Minung pakhat nih a chimmi cu phung kan ngeihmi kan ngol hlanah a ka sual pi a ti i, pakhat nih cun a ka sual pi manh hlanah ka zam mamh a ti.
Social worker pakhat nih a chimmi cu 'nu hmei thianhhlimh phung hi kan hman ngaimi a si tiah a chim. An pasal nih an thih tak kaami nuhmei poah kha khuami nih an tuah tawnmi phung bantukin pa nih an ih pi hna. Zan khat ah voithum an sual pi hna i, zan thum in zan li karlak tiang an pehzulh.
A chungkhar chung in si loin a leng minung kha an hlan tawn hna. Aric Aniva tbk kha hlan i an nuhmei hna kha an khua phung bantukin sualnak tuah pi an si. Pahmei a si ahcun a sual pitu ding ah nu kawl a hau ve.
An phung ah hin thih tak kaami nuhmei thianhnak caah pa nih sual pi a si i, an fanule tleirawl hrawng a vun si in an hngakchiatnak hlo cang hna seh law nu tling dirhmun tlai ve cang hna seh tiah sual pinak an tuah than.
Aric Aniva nih sual an puhnak ah a chimmi cu an khua phung bantukin sualnak tuah pi ding in a kan hlan caah a si a ti, asinain HIV a ngeih aa theih hnu tiang ah a tuah pi hna. An khua pastor Paul Mzimu nih a chimmi cu 'HIV cu mi thattu a si. HIV a ngeih buin zeitin dah a tuah peng rih? Khuachia pa a si. Keimah cu biaceihtu cu si ning law thihdan le nunchung thongthlak daan ka pek lai' a ti. Ref: BBC.