Japan Prime Minister Shinzo Abe nih a chimmi cu fiang ko - fiang ko in nilini ah president thimmi Donald Trump he biaruahnak kan ngei a ti. President rian a tlaih hlan in New York ah an i tong.
Abe zong a lungtling. Japan le US karlak pehtlaihnak cu a hlan tawn bantukin a kal ko lai timi zumhnak he an meeting an donghter. Kan hnu zarh ah president teinak a co hnu in atu hi a voikhatnak ramdang hruaitu le Trump an i ton a si.
Abe nih a chim thanmi cu ramdang hruaitu dangdang he tonnak kan ngeih hlanah president thimmi Trump he tonnak caan tha ka hmuh caah ka lawm tuk tiah Abe nih reporttu hna sinah a chim. Japan le US pehtlaihnak a thatnak ding ahcun kap hnih karlak ah zumhnak a um a hau tiah a chim chih.
Trump nih campagin a tuah lioah a chimmi cu Japan ah kan ralkap a ummi zong kan lak cang hna lai. Anmah tein an ram cu i ven ve ko cang hna seh; kan ralkap tangka bawmhnak zong an pe lo a rak ti. Japan thin a phang i a rannak in PM Abe nih Trump a ton colhnak zong a si.
Asinain Abe sinah Trump team nih an chimhmi cu campagin a tuah lio biachim kha aa biatak in a chimmi a si lo. A chim ning in lakpiak ding a si lo tiah an rak ti. An meeting a dih hnuah Abe nih a chimmi cu 'Trump hi ka bochan ngam dingmi hruaitu a si' tiah a chim. Ref: CNN.