President Obama cu khual a tlawn lio a si. Germany Berlin ah bia a chim i, a vun chaangtu ding Donald Trump kong zong a chim chih. Politics ah aa biatak a hau lai a ti. Russia he pehtlaihnak kongah hin aa biatak a hau a ti.
Russia nih international phung le lam a buar i, US duhnak a zulh lo ahcun President ding Donald Trump nih Russia hi a dironh a hau lai tiah a forhfial. Obama nih Trump a thangthatnak cu NATO kongah a si. Inn Raang ah tonnak an ngeih ah khan NATO ka dirkamh ko lai tiah Obama sinah a chim.
Campaign a tuah lioah cun NATO cu kan herh ti lo; a hlun cang a rak ti i, NATO ram zong lungawtawm in an um dih. Atu tiang zongah an hnangam rih hna lo. President Obama nih EU a khualtlawnnak ah NATO le US pehtlaihnak aa hnin lai lo tiah a kamh than hna.
Obama le Merkel chan ah hin US-Germany pehtlaihnak a tha ngai. Obama nih Mrs. Merkel dir pimi phung, zumh awktlak sinak le dinfelnak le khuaruahnak cungah thangthatnak bia a chim. Ram hnih karlak pehtlaihnak kan pehzulh lai, US le EU zong hmun khat ah rian an tuan ti peng ko lai timi biaruahnak zong an ngei chih. Ref: BBC.