Tuak thiam pawl nih 'zeitin dah kan tuakmi kan palh ning a si hnga tiah an khuaruahhar tiah Trump nih Clinton a teimi cungah an lungtling lo; Pathian riantuannak a si zia an theithiam lo tiah Franklin Graham nih a facebook ah a tial.
Tutan thimnak ah hin 'Pathian aa langh lo maw?' Secular media nih atu le atu in 'zeitin dah Trump nih a tei ning a si,' zeidah a cang,' zeitin dah kan tei lo ning a si' an ti tiah Samaritan's Purse President evangelist Franklin Graham nih a tial.
A nolh than rih, 'cheukhat cu an khuaruahhar. Politician lianlian an khuaruahhar. Cheukhat nih an ruahmi cu Trump le Pence caah teinak lam a um lo an ti. Asinain ahohmanh nih Pathian riantuannak an thei lo' a ti than. Cheukhat nih an i thawh than i, 'Trump nih a teinak cu Penncylvania le Wisconsin tbk states i riantuan hna vote ruangah a si' an ti. Asinain Graham nih cun an palh diamdiam ah a chiah hna.
United States pumpi ah a thongthong in Khrihfami hna thla an cam. Tu kum ah Khrihfami hna an chuak i thimnak ca le America hmailei caah thla an cam. Thlacam bu kan dirh. Chungkhar nih an cam i, Khrihfabu nih an cam. Cun Khrihfami hna vote thlak ah kan kal i, Pathian nih khuaruahhar thil a tuah' a ti.
A nolh than rihmi cu 'Media kip le expert hna nih zeitindah Trump nih a tei ning a si hnga tiah an lung an i kheuh. Asinain kan ram hi Pathian thei lo ruahnak le agenda nih a uk sualnak hnga lo nihnihni zan ah Pathian aa phuang' tiah Graham nih chim.
New York Times nih cun vote thlak ah Evangelical Khrihfami a bung in an rak i bung i, tam deuh nih Trump le Mike Pece tiket an thlak a ti.