President Donald Trump tlakter i, Pi Hillary Clinton kaiter thannak lam a um ti maw ti hi zapi nih cun kan ruat lem lai lo. Kan theih balmi zong a si lem lai lo i, US tuanbia zong ah an tuah balmi a si lem lai lo.
Vote cu an thlak cang i, Donald Trump nih electoral vote 290 - 228 in Clinton a tei cang. Popular vote in cun Clinton nih 200,000 in a tei ve. President tlinnak le hmuhnak caah Trump nih electoral vote tam deuh a hmuh caah Inn Raang pi a co kanh diam!
Asinain US phunghram ah cun President thimtu taktak cu Electoral College an si bantukin December 19 ah electoral college nih President le vice president thimnak vote thlak a um than lai. An duh ahcun Trump thlak loin Clinton zong an thlak khawh. Anmah cungah aa hngat.
Asinain voi dang ah, cu bantukin vote an thla bal lo. America tuanbia ah electoral college nih an vote dingmi pa vote loin midang vote ti hi 99% cu a um bal lomi a si. An i kam bantukin an vote zungzal deuh hna. Minung zeimawzat tete nih cun an tuah pah theo lengmang.
Asinain midang vote pek zong a sualnak a um lo i, an duhmi pa/nu zong an vote khawh thiamthiam. Cu bantuk minung cu 'faithless elector' (zumhnak ngei lo thimtu) tiah an auh ve hna. 2004 ah min chim lo pakhat nih Democrat John Kerry vote loin a zuamtu John Edwards tu a rak vote.
Faithless elector nih an biakam an let i, midang an vote hna tikah vote an thui ngai kho ve hlei lo. Faithless minung hi 150 hrawng cu US thimnak tuanbia ah an um cang lai tiah. Trump zong an uar lo tuk ahcun hmaithla ah hrokhrolnak chuah sual a fawite.